ناتنیاهو: "متمانەیەکی بەرفراوانمان بەدەست هێنا"

قودس-AA

سەرۆکوەزیرانی پێشووی ئیسرائیل و سەرۆکی پارتی لیکۆد، بێنیامین ناتانیاهو رایگەیاند کە لە میانی پرۆسەی دەنگداندا، پارتەکەی (لیکۆد) متمانەیەکی بەرفراوانی بەدەستهێناوە و پێی باشتربوو کە چاوەڕوانی دەرئەنجامە کۆتاییەکانی هەڵبژاردنەکان بکات بەرلەوەی سەرکەوتنی لیکۆد رابگەیەنێت.

بەرەبەیانی ئەمڕۆ، بێنیامین ناتانیاهو لە گوتارێکی بۆ لایەنگرانی لە قودسی رۆژئاوا گوتی: "متمانەیەکی بەرفراوانمان بەدەست هێنا. جارێکی دیکە روون بووەوە کە بەپەراوێزێکی زۆر گەورە، لیکۆد گەورەترین پارتە لە ئیسرائیل".

گوتیشی: "هێشتا پێویستە چاوەڕوانی دەرئەنجامەکان بکەین، بەڵام ئێمە خەریکە سەرکەوتنێکی زۆر گەورە بە دەست دەهێنین".

سەرۆکوەزیرانی پێشووی ئیسرائیل و سەرۆکی پارتی لیکۆد، بێنیامین ناتانیاهو لە درێژەی گوتارەکەیدا گوتی: "هێشتا دەرئەنجامە راستەقینەکان نازانین، پێویستە ئارام بگرین. هەرچۆنیک بێت، داوای پوختییەکی تەواو دەکەین لە هەڵبژاردنەکان".

بەپێی ئەو راپرسیی و دەرئەنجامە بەراییانەی کە بڵاوکراونەتەوە، پارتی لیکۆد بە سەرۆکایەتی بێنیامین ناتانیاهو لە کۆی ١٢٠ کورسی کە پەرلەمانی ئیسرائیلی لێ پێکهاتووە، ٦٢ کورسی بەدەستهێناوە و ئەمەیش بواری بۆ دەرخسینێت کە بەتەنها حکوومەتی داهاتووی ئیسرائیل پێکبهێنێت.

سەرۆکی پارتی لیکۆد، بێنیامین ناتانیاهو هەروەها گوتی: "گەل رێگایەکی دیکەی دەوێت، ئاسایشی دەوێت، دابەزاندنی نرخەکانی دەوێت، دەسەڵاتی دەوێت و گەل دەوڵەتێکی جوولەکەی دەوێت".

گوتیشی: "حکوومەتێکی نیشتمانیی پێکدەهێنم کە بایەخ بە هاووڵاتییانی ئیسرائیل بدات بەبێ جیاوازی".

چاوەڕوان دەکرێت سبەی پێنجشەممە، دەرئەنجامە کۆتاییەکانی هەڵبژاردنە گشتییەکانی ئیسرائیل کە دوێنێ سێشەممە یەکی تشرینی دووەمی ٢٠٢٢ بەڕێوەچوون رابگەیەندرێت.