MUŞ

 Li Mûşê Mevlut Erdencî ku di zaroktiya xwe da ji ber ku ket tendûrê û şewitî, bû astengdar. Mevlut ji ber hindê jiyana xwe ya mayîn li ser sandalyeya biteker didomîne. Lêbelê Erdencî di 13 saliya xwe da basketobl nas kir, gelekî xîret kir û hevrazî nava Tîma Neteweyî bû.

Mevlutê ku li Mûşê dijî di 3 saliya xwe da ket tendûrê û di encamê da dest û pêyên wî şewitîn. Mevlut ji wî çaxî vir va bû astengdar û herwiha bû mehkûmî sandalyeya biteker. Lê Mevlut dema ku bû 13 salî basketbol nas kir.

Werzişvanê ciwan pêşiyê di Klûba Werzişê ya Astengdaran a Mûşê da dest bi basketbolê kir û dû ra derbasî Tîma Neteweyî ya Ciwanan a Basketbola Sandalyeya Biteker bû.

Tîma Neteweyî ya Basketbola Astengdaran, di Şampiyonaya Basketbola Sandalyeya Biteker a Ewropayê ya Binê 22 Saliyê ku îsal di 8-16ê rêbendanê da li Îtalyayê hat lidarxistin da madalyona zêrîn bi dest xist û herwiha di Şampiyonaya Basketbola Sandalyeya Biteker a Binê 22 Saliyê ya Dinyayê ku îsal di 8-16ê hezîranê da li Torontoya paytexta Kanadayê hat lidarxistin da bû duyemîn. Mevlut Erdenciyê ku di nava vê tîma serkeftî da ye ji bo zêdetir serkeftinê, xebatên xwe bênavber didomîne.

- "Basketbol bû per û baskên min"

Mevlut Erdencî di daxuyaniya xwe ya ku da peyamnerê AAyê da destnîşan kir ku ji basketbolê zehf hez dike û dema ku basketbolê dilîze pir kelecanî dibe.

Mevlut diyar kir ew pê serbilind e wekî ku li dervayî welat nûnertiya Tirkiyeyê dike û wiha xeberda, "Beriya ku ez dest bi basketbolê bikim û ji bo tîma neteweyî bêm vexwendin, ez ji jiyanê xeyidîbûm. Lê niha basketbol bû per û baskên min. Berê xêncî Mûşê ez neçûbûm derekî, lê vêga ez diçim gelek bajêr û welatî."

Mevlut Erdencî bal kişand ku divê astengdar ji jiyanê nexeyîdin û teqez bi şaxeke werzişê ra eleqedar bibin.

- "Mevlut gelekî bixîret bû"

Serokê Klûba Werzişê ya Astengdaran a Mûşê Bedrî Korkmanz jî diyar kir ji bo ku astengdar jî tevlî jiyana sosyal bibin, ew xebat û fealiyetan dimeşînin.

Korkmaz got ku wan, Mevlut kir endamê klûbê û wiha xeberda:

"Mevlut gelekî bixîret bû û pir xebitî. Mevlut bû rûmeta Mûşê. Em spasiya wî dikin ku alaya Tirkiyeyê da bilindkirin."