دیدار رئیس اجرایی دولت افغانستان با رئیس جمهور تاجیکستان

دوشنبه / خبرگزاری

به گزارش دفتر ریاست جمهوری تاجیکستان، امام علی رحمان، رئیس جمهور این کشور با عبدالله عبدالله، رئیس اجرایی دولت افغانستان در حاشیه هفتادمین نشست مجمع عمومی سازمان ملل متحد در نیویورک آمریکا با هم دیدار و گفتگو کردند.

در این دیدار طرفین در مورد چگونگی طرح‌های مشترک اقتصادی و منطقه‌ای؛ مانند پروژه انتقال برق از تاجیکستان و قرقیزستان به افغانستان و پاکستان موسوم به "کاسا 1000"، راه آهن تاجیکستان - افغانستان - ترکمستان و خط لوله گاز با هم مذاکره کرده‌اند.

این دو همچنین مسایل امنیتی از جمله برقراری صلح و ثبات در مناطق مرزی میان دو کشور همسایه را مورد بررسی قرار دادند.

تاجیکستان پس از پاکستان، با 1300 کیلومتر طولانی ترین مرز را با افغانستان دارد. ولایت‌های بدخشان، تخار و قندوز در شمال شرق افغانستان با ولایت‌های ختلان و بدخشان تاجیکستان در جنوب این کشور هم مرز هستند.

تاجیکستان که خود یک جنگ داخلی را پشت سر گذاشته و گهگاه با شورش فرماندهان سابق روبرو می‌شود، با خطر پیشروی طالبان در شمال افغانستان و ورود جنگجویان افراطی از طریق این مرز به خاک خود مواجه است. شب گذشته شبه‌نظامیان طالبان شهر قندوز افغانستان را تحت تصرف خود درآوردند.