Önder Beyter
27 Rêbendan 2019•Rojanekirin: 27 Rêbendan 2019
SAO PAULO
Hat ragihandin li rojavayê başûrê Brezilyayê duh piştî ku bendava gemara madenekê rûxiya, cesedê 34 kesan hatin dîtin.
Di daxuyaniya teşkîlata îtfaiyeyê Minas Geraisê da hat destnîşankirin, duh piştî ku bendava gemara madeneke cewherê hesin rûxiya, cesedê 34 kesan hatin dîtin, 23 kes bo nexweşxaneyê hatin veguhastin û qedera 300 kesî hê jî wenda ne.
Di daxuyaniyê da hat destnîşankirin ku li herêmê xebatên lêgerîn û xilaskirinê berdewam in û herwiha tirs heye ku hejmara miriyan zêde bibe.
Berpirsên şîrketa madenê ragihandibûn, dema ku bendav rûxiyabû li ciyê bûyerê piraniya wan karker 427 kes hebûn û ji wan jî 279 kes hatin xilaskirin.
Sedemê rûxînê bendavê hê jî nayê zanîn.
Di daxuyaniya şîrketa madenê ya Brezilyayî Vale SAyê da hatibû destnîşankirin ku bermahiya cewherê gihîşt wargehê Vila Ferteco yê girêdayî bajarê Brumadinhoyê û şêniyên ku li hin semtên bajêr dijîn hatin texliyekirin û herwiha ekîbên îtfaiyeyê jî ji beja û asîman xebatên xwe yên lêgerîn û xilaskirinê didomînin.
Serokê Dewleta Brezilyayê Jair Bolsonaro ragihandibû ku ew ji ber bûyerê gelekî li ber xwe ket û ew ê 3 wezîran bişîne herêmê.
Li Brezilyayê dîsa di sala 2015an da li Marinaya girêdayî Minas Geraisê, bendava gemara madenekê ya Vale SA û şîrketa BHP Billiton a Awistralyayî rûxiyabû û di ecamê da 19 kes miribûn û bi sedan kes neçar mabûn ku malên xwe biterikînin.
