Sindikata policore e Maqedonisë dhe Kosovës me memorandum bashkëpunimi

SHKUP (AA) – Sot në Shkup udhëheqësit e Sindikatave të Policisë së Republikës së Maqedonisë dhe Republikës së Kosovës nënshkruan Memorandum bashkëpunimi me anë të së cilës u zotuan për mbështetje të ndërsjellë, formim të trupave dhe komision të përbashkët si dhe çështjeve të tjera me interes të përbashkët, raporton Anadolu Agency (AA).

Bazuar në nënshkrimin e memorandumit, sindikatat policore të të dyja vendeve fqinje u dakorduan edhe për dhënien e ndihmës dhe mbështetjes së ndërsjellë në rastet kur çdo anëtar i cilës do sindikatë ka nevojë për ndihmë kur ndodhet në territorin e Maqedonisë dhe Kosovës.

Kryetar i Sindikatës së Maqedonisë, Aco Antovski, tha se Kosova dhe Maqedonia kanë probleme të përbashkëta në kushtet e punës së policisë së të dyja vendeve fqinje, kushte të cilat, sipas tij, janë komplekse.

Antovski theksoi se bashkëpunimi mes dy sindikatave do të kontribuojë në përmirësimin e kushteve të punës së policive të të dyja vendeve, ndërkohë nuk përjashtoi edhe mundësinë e bashkëpunimit me sindikatat e vendeve tjera të rajonit për të ardhmen.

“Sot nënshkruajmë një memorandum për bashkëpunim që bazohet në parimet e kolektivitetit, profesionalizmit, bashkëpunimit dhe mbështetjes së ndërsjellë si dhe respektimit të të gjithë anëtarëve të të dy sindikatave, pa marrë parasysh përkatësinë e tyre etnike dhe politike”, deklaroi Antovski.

Nga ana tjetër, kryetarja e Sindikatës së Policisë së Kosovës, Valbona Kamberi-Hoxha, tha se ky është një hap i ri për të të dy sindikatat në drejtim të bashkëpunimit të ndërsjellë për një të ardhme të largët.

“Ky memorandum ka një vlerë shumë të madhe si nga ana e Sindikatës së Policisë së Kosovës, gjithashtu edhe nga ana e Sindikatës së Policisë së Maqedonisë, sepse do të na hap rrugë jo vetëm në profesionalizëm, por edhe në bashkëpunim të ndërsjellë në rastin e organizimit sindikal, qoftë të trajnimeve, bashkëpunimit të mëtejshëm, por qoftë edhe në organizimet e fondeve të përbashkëta të cilat do të jenë në favor të të dy sindikatave”, deklaroi Hoxha.