Agim Sulaj
19 Mars 2023•Përditësim: 19 Mars 2023
Bashkimi Evropian (BE) ka publikuar përmbajtjen e aneksit të zbatimit të marrëveshjes për normalizim raportesh në mes të Kosovës dhe Serbisë për të cilën është rënë dakord të shtunën në Ohër nga kryeministri i Kosovës Albin Kurti dhe presidenti i Serbisë, Aleksandër Vuçiq, me ndërmjetësimin e BE-së, transmeton Anadolu.
Sipas tekstit të publikuar Kosova dhe Serbia do të angazhohen plotësisht për të respektuar të gjitha nenet e Marrëveshjes dhe këtë Aneks dhe të implementojnë të gjitha detyrimet që rrjedhin nga Marrëveshja dhe Aneksi, “në mënyrë të përshtatshme dhe në mirëbesim”.
“Palët kanë parasysh se Marrëveshja dhe Aneksi i Implementimit do të bëhet pjesë kyçe e proceseve të tyre të anëtarësimit në BE. Palët marrin shënim se menjëherë pas miratimit të Marrëveshjes dhe këtij Aneksi, lehtësuesja, BE-ja do të nisë procesin për të amendamentuar Kapitullin 35 për Serbinë për të pasqyruar detyrimet e reja të Serbisë që rrjedhin nga Marrëveshja dhe ky Aneks. Axhenda e Grupit Special të Kosovës për Normalizim po ashtu do të reflektojë obligimet e reja të Kosovës që burojnë nga Marrëveshja dhe Aneksi”, thuhet në tekstin e publikuar.
Po ashtu, një nga pikat e marrëveshjes specifikon se “Palët bien dakord që të miratojnë si çështje urgjente Deklaratën për Personat e Zhdukur, siç është negociuar në dialogun e lehtësuar nga BE-ja”.
Për ta implementuar nenin 7, Kosova sipas aneksit “fillon menjëherë negociatat brenda dialogut të lehtësuar nga BE-ja për të krijuar aranzhime dhe garanci specifike për të siguruar nivel të përshtatshëm të vetëmenaxhimit për komunitetin serb në Kosovë, në përputhje me marrëveshjet e mëparshme përkatëse në dialog, siç përcaktohet nga BE-ja lehtësuese”.
“Palët bien dakord që brenda 30 ditësh të krijojnë një Komitet të Përbashkët Monitorimi, të kryesuar nga BE-ja. Zbatimi i të gjitha dispozitave do të sigurohet dhe mbikëqyret nga Komiteti i Përbashkët Monitorues. Për ta implementuar nenin 9, BE-ja do të organizojë konferencë të donatorëve brenda 150 ditësh për të krijuar një paketë të investimeve dhe financiare për Kosovën dhe Serbinë. Asnjë disbursim nuk do të ndodhë përpara se BE-ja të përcaktojë se të gjitha dispozitat e Marrëveshjes janë implementuar plotësisht”, shkruan aneksi.
Gjithashtu, Kosova dhe Serbia në bazë të marrëveshjes pajtohen që të gjitha nenet do të implementohen në mënyrë të pavarur nga njëra-tjetra dhe “Rendi i paragrafëve të këtij Aneksi është pa paragjykim ndaj rendit të implementimit të tyre”.
“Kosova dhe Serbia pajtohen të mos e bllokojnë implementimin e asnjërit nen. Të gjitha diskutimet në lidhje me zbatimin e Marrëveshjes do të zhvillohen në kuadër të dialogut të lehtësuar nga BE-ja. Kosova dhe Serbia pajtohen se çdo mosrespektim i obligimeve nga Marrëveshja, Aneksi apo marrëveshjet e kaluara të dialogut, mund të kenë pasoja të drejtpërdrejta negative për procesin e tyre përkatës të anëtarësimit në BE dhe ndihmën financiare që marrin nga BE-ja”, përfundon aneksi.
Kjo shtojcë përbën një pjesë integrale të Marrëveshjes për të cilën palët ranë dakord në Bruksel më 27 shkurt në Bruksel.
