Bosnjë e Hercegovinë (BeH) sot feston Ditën e Pavarësisë, raporton Anadolu.
Në këtë ditë, me vullnetin e shumicës së qytetarëve, BeH mori vendimin që të pavarësohet nga Republika Socialiste Federative e Jugosllavisë.
Referendumi për pavarësinë e BeH-së u mbajt me rekomandimin e Komisionit të Arbitrazhit të Konferencës Ndërkombëtare për Jugosllavinë, në fazën përfundimtare të shpërbërjes së ish-RSFJ-së. Referendumi u mbajt më 29 shkurt dhe 1 mars 1992 dhe tregoi përkushtimin e qytetarëve për të ardhmen e vendit, ndërsa ishte edhe si pretekst i luftës.
Qytetarët me të drejtë vote në Republikën Socialiste të BeH-së votuan për pavarësinë e vendit në një referendum ku pyetja e vetme ishte: "A jeni për Bosnjë e Hercegovinë sovrane dhe të pavarur, një shtet të qytetarëve të barabartë, popujve të Bosnjë e Hercegovinës - muslimanëve, serbëve, kroatëve dhe anëtarëve të kombeve të tjera që jetojnë këtu?".
Pavarësia u mbështet kryesisht nga boshnjakët dhe kroatët ndërsa një numër i madh i serbëve e bojkotuan referendumin për shkak të thirrjes së SDS që serbët të mos votojnë në referendum.
Në referendum morën pjesë gjithsej 2.073.568 votues, të cilët përfaqësonin një pjesëmarrje prej 63.6 për qind. Nga numri i përgjithshëm i votuesve, 99.7 për qind votuan për pavarësinë dhe 0.3 për qind votuan kundër këtij vendimi. Rezultatet e referendumit u pranuan më 6 mars të po këtij viti në Parlamentin e BeH-së.
Dekreti për shpalljen e ligjit për shpalljen e 1 marsit si Ditë të Pavarësisë së BeH-së dhe festë kombëtare u nënshkrua nga kryesuesi i Presidencës së Republikës së BeH-së, Alija Izetbegoviq, më 6 mars 1995, saktësisht tre vite pasi Komisioni Republikan Zgjedhor i Republikës Socialiste të BeH-së konfirmoi rezultatet e referendumit për përcaktimin e statusit të BeH-së.
Më 28 shkurt 1995, Parlamenti vendosi të shënojë 1 Marsin si Ditën e Pavarësisë së BeH-së. Dita e Pavarësisë u festua për herë të parë më 7 prill 1995. Komuniteti Ekonomik Evropian e njohu këtë ditë si Ditën e Pavarësisë së BeH-së.
Qeveria në entitetin e BeH-së, Republika Sërpska e konteston këtë ditë, prandaj kjo ditë festohet vetëm në Federatën e BeH-së.
