Kosovë, 2 viktima dhe 247 të infektuar nga COVID-19

Ministria e Shëndetësisë e Kosovës në raportin 24-orësh lidhur me rastet e reja të koronavirusit të ri (COVID-19) ka njoftuar se 2 persona të infektuar me koronavirus kanë vdekur, derisa numri i viktimave nga ky virus ka shkuar në 3.078, transmeton Anadolu Agency (AA).

Bazuar në të dhënat e fundit të Institutit Kombëtar të Shëndetësisë Publike në Kosovë (IKSHPK), vendi ka regjistruar 247 raste të reja me koronavirus, me çka numri i tyre ka shkuar në gjithsej 223.188.

Në 24 orët e fundit në institucionet shëndetësore janë testuar gjithsej 2.314 mostra të dyshuara për COVID-19 ndërsa deri më tani janë bërë gjithsej 1.728.500 teste.

Të dhënat e fundit kanë njoftuar për 2.096 persona që kanë fituar betejën me koronavirusin. Numri i përgjithshëm i të shëruarve deri më tani ka arritur në 209.312, ndërsa numri i rasteve aktive është 10.800.

Sa i përket procesit të vaksinimit, gjatë 24 orëve të fundit janë dhënë 302 doza të vaksinës, ndërsa prej fillimit të vaksinimit në të gjitha qytetet e Kosovës janë dhënë 1.801.548 doza të vaksinës. Deri më sot 810.798 qytetarë janë vaksinuar me dozën e dytë.