Agjencia e motit e OKB-së paralajmëron për "jobalancë rekord klimatike"

Klima e Tokës tani është "më jashtë balancës se çdo herë në historinë e regjistruar", tha Organizata Botërore Meteorologjike (OBM), duke paralajmëruar për pasoja afatgjata të shkaktuara nga rritja e përqendrimeve të gazrave serrë, transmeton Anadolu.

Sipas raportit të OBM-së "Gjendja e Klimës Globale 2025", periudha nga 2015 deri në 2025 ishte periudha 11-vjeçare më e nxehtë e regjistruar.

Viti 2025 renditet si viti i dytë ose i treti më i nxehtë, rreth 1,43 gradë Celsius mbi mesataren të periudhës 1850-1900.

Ngjarje ekstreme të motit, përfshirë nxehtësinë intensive, reshjet e dendura dhe ciklonet tropikale, shkaktuan ndërprerje të gjera dhe nxorën në pah ndjeshmërinë e ekonomive dhe shoqërive të ndërlidhura, thuhet në raport.

Oqeanet vazhduan të ngrohen dhe të thithin dioksid karboni, duke marrë çdo vit ekuivalentin e rreth 18 herë përdorimit vjetor të energjisë nga njeriu gjatë dy dekadave të fundit.

Sipas raportit, akulli i Detit Arktik arriti nivele afër rekordit më të ulët ndërsa akulli i Detit Antarktik ishte i treti më i ulët i regjistruar, dhe shkrirja e akullnajave vazhdoi.

"Gjendja e Klimës Globale është në gjendje emergjence. Planeti Tokë po shtyhet përtej kufijve të tij. Çdo tregues kyç klimatik po jep sinjal të kuq", tha sekretari i përgjithshëm i OKB-së, Antonio Guterres.

"Njeriu sapo ka përjetuar njëmbëdhjetë vitet më të nxehta të regjistruara. Kur historia përsëritet njëmbëdhjetë herë, nuk është më rastësi. Është një thirrje për veprim", shtoi ai.