Blinken bisedon me dëshmitarët e ujgurëve të arrestuar në kampet kineze në Xinjiang

Sekretari i Shtetit të SHBA-së, Antony Blinken bisedoi me dëshmitarët e ngjarjeve në kampet e përqendrimit ku anëtarët e komunitetit ujgur në provincën autonome kineze Xinjiang po mbahen me forcë, transmeton Anadolu Agency (AA).

Zëdhënësi i Departamentit të Shtetit, Ned Price tha se Blinken foli përmes një platforme online me shtatë persona që kanë dalë nga kampet e përqendrimit në Xinjiang si dhe anëtarët e familjes së të arrestuarve aktualë dhe aktivistëve të të drejtave të ujgurëve.

"Sekretari Blinken dëshironte të dëgjonte dëshmi të dorës së parë për këtë çështje. Ai beson se është e rëndësishme të dëgjosh dëshmi të drejtpërdrejta për krimet dhe ndalimin e detyruar të një milion ujgurëve në Xinjiang. Ishte gjithashtu një mundësi për bashkëbiseduesit e Blinkenit që të parashtrojnë mendimet dhe sugjerimet e tyre", tha Price.

Ai vuri në dukje se administrata e presidentit të SHBA-së, Joe Biden ka një politikë plotësisht të qartë për këtë çështje.

"Amerika është gjithmonë mjaft e hapur në lidhje me shkeljet e të drejtave, krimet dhe gjenocidin që po ndodhin në Xinjiang", tha Price.

Price njoftoi vendosjen e mundshme të sanksioneve të reja amerikane ndaj Kinës.

Më 22 mars, SHBA-ja, Kanadaja, Mbretëria e Bashkuar dhe Bashkimi Evropian vendosën sanksione ndaj zyrtarëve kinezë për shkeljen e të drejtave të ujgurëve në Xinjiang.

Provinca autonome Xinjiang është provinca më e madhe kineze me një popullsi kryesisht muslimane të përbërë nga anëtarë të komunitetit turk ujgur dhe kazakë etnikë.

Organizatat kineze të të drejtave të njeriut janë përpjekur prej kohësh të sensibilizojnë komunitetin ndërkombëtar për problemin ujgurëve në Xinjiang, në të cilin miliona njerëz janë burgosur në të ashtuquajturit "kampe transformimi dhe riarsimi".

Po ashtu dhe organizata ndërkombëtare Human Rights Watch (HRW) deklaroi në një raport të mëparshëm se shumë njerëz në Xinjiang kanë përfunduar në paraburgim në të ashtuquajturat qendra të edukimit politik në dy vitet e fundit dhe se këta janë njerëz të cilët autoritetet i vlerësuan si të rrezikshëm dhe urdhëroi të masat e ashtuquajtura parandaluese të veprimit policor.

Bashkimi Evropian shprehu shqetësim për ekzistencën e këtyre qendrave dhe ua bëri të qartë këtë zyrtarëve kinezë në një takim të Dialogut për të Drejtat e Njeriut.

Pekini zyrtar mohon ekzistencën e kampeve të tilla në Xinjiang ndërsa Ministria e Punëve të Jashtme kineze pretendon se këto janë qendra që përdoren ekskluzivisht për arsimin profesional.