Egjipti dhe Katari "koordinohen çdo ditë" për të ulur tensionet rajonale

Egjipti dhe Katari po koordinohen çdo ditë për të ulur tensionet rajonale dhe për të forcuar përpjekjet diplomatike, tha të enjten ministri i Jashtëm egjiptian, Badr Abdelatty, transmeton Anadolu.

Abdelatty i bëri komentet në një konferencë të përbashkët shtypi me Sheikh Mohammed bin Abdulrahman Al Thani, kryeministër dhe ministër i Jashtëm i Katarit, në qytetin bregdetar të Egjiptit, Al-Alamein.

"Ka një koordinim të përditshëm midis Egjiptit dhe Katarit për të reduktuar përshkallëzimin dhe për të përmirësuar diplomacinë në rajon," u tha Abdelatty gazetarëve.

Ai theksoi nevojën që vendet të respektojnë ligjet ndërkombëtare që rregullojnë lundrimin detar, duke thënë se Kajro "dënon dhe denoncon" sulmet iraniane ndaj Katarit dhe shteteve të tjera të Gjirit, të cilat ai i përshkroi si "shkelje të hapur" të sovranitetit kombëtar.

“Siguria e Katarit dhe e vendeve simotra të Gjirit është një pjesë integrale e sigurisë kombëtare egjiptiane dhe sigurisë kombëtare arabe,” tha ai.

Kryediplomati i Kajros tha se Egjipti dhe Katari ranë dakord se siguria e Detit të Kuq është përgjegjësi e përbashkët e atyre shteteve që kufizohen me rrugën ujore.

Sheikh Mohammed, nga ana e tij, tha se lundrimi përmes Ngushticës së Hormuzit duhet të sigurohet duke rivendosur kushtet që mbizotëronin përpara luftës aktuale rajonale që përfshin Iranin, Izraelin dhe Shtetet e Bashkuara.

Ai tha gjithashtu se rruga strategjike ujore nuk duhet të shfrytëzohet nga asnjë vend për të “shantazhuar” palët e tjera.

“Pasojat e kësaj lufte kanë qenë të rënda, si për Gjirin dhe gjetkë në botë,” tha ai.

“Ne kemi nevojë që situata të kthehet në atë që ka qenë”, shtoi Sheikh Mohammed, duke dënuar ato që ai i quajti “kërcënimet dhe pengesat” që ndikojnë në lundrimin përmes ngushticës së Hormuzit.