Franca në kërkim të stabilitetit financiar

Ministri francez i Ekonomisë, Roland Lescure paralajmëroi sot se vendi do të “përplaset me murin” nëse nuk bëhet konsolidimi buxhetor, duke theksuar se një buxhet është thelbësor për të rikthyer rritjen ekonomike dhe për t'u dhënë siguri investitorëve, transmeton Anadolu.

“Na duhet një buxhet”, tha Lescure për "Franceinfo", duke shtuar se "është absolutisht thelbësore të sigurojmë që të mund të kthehemi në rrugën e rritjes dhe t'u japim siguri të gjithë investitorëve, sepse Franca nuk po shkon drejt një krize”.

“Rritja ka munguar prej tre tremujorësh”, tha ai duke e përshkruar ekonominë franceze si në stanjacion për vitin 2026. “Franca nuk po shkon drejt një krize”, theksoi Lescure.

“Sot nëse nuk e kemi konsolidimin buxhetor të përfshirë në buxhet, do të përplasemi me murin", tha ministri francez.

Lescure e përshkroi Nenin 49.3 të Kushtetutës dhe dekretet qeveritare si “mekanizma sigurie” për të garantuar që vendi të ketë një buxhet, nëse miratimi nga parlamenti rezulton i pamundur. Neni 49.3 i lejon qeverisë të miratojë legjislacion pa votim parlamentar, nën kushte të caktuara.

Ai tha se janë marrë 400 kërkesa për kredi pa interes nga biznese që janë prekur nga vandalizmi. Sipas tij, midis 1.000 dhe 1.500 biznese janë “vandalizuar vërtet” ndërsa rreth 3.000 të tjera janë “prekur”, ndonëse jo domosdoshmërisht të vandalizuara.

“Ne qëndrojmë krah për krah me pronarët e bizneseve”, tha Lescure duke shtuar se sot do të vizitojë bizneset e prekura në Bordo.