Gjermania paralajmëron për luftë izraelito-libaneze

Gjermania ka paralajmëruar për një rrezik “real” të përshkallëzimit në konfliktin e vazhdueshëm në rajonin kufitar izraelito-libanez, transmeton Anadolu.

“Situata mbetet e tensionuar dhe rreziku i përshkallëzimit është real. Ne vazhdimisht kemi theksuar se përshkallëzimi rajonal duhet të shmanget me çdo kusht”, tha Sebastian Fischer, zëdhënës i Ministrisë së Punëve të Jashtme, para gazetarëve në Berlin.

Dje, ushtria izraelite tha se kishte përfunduar një hap tjetër në përgatitjen për një luftë të mundshme përgjatë frontit të saj verior, ku ka pasur luftime me grupin libanez Hezbollah për gjashtë muaj.

Izraeli ka kryer sulme thellë brenda territoreve libaneze, duke pretenduar se ka shënjestruar komandantët ushtarak të Hezbollahut.

Ka pasur spekulime se tërheqja taktike e fundit e Izraelit nga Gaza jugore mund të krijojë skenën për një luftë me Hezbollahun.

Fischer “përshëndeti” tërheqjen izraelite nga qyteti Khan Younis, por theksoi se populli i Gazës është ende në nevojë të madhe për më shumë ndihma humanitare.

“Është një lajm i mirë që njerëzit mund të kthehen në Khan Younis, por në të njëjtën kohë është e qartë se ky nuk është fundi i luftës. Në Khan Younis, njerëzit gjithashtu do të vazhdojnë të varen nga ushqimi, uji i pastër dhe ndihma mjekësore dhe për këtë arsye ne vazhdojmë t’i bëjmë thirrje urgjentisht qeverisë izraelite që të lejojë më shumë ndihmë humanitare në Rripin e Gazës”, tha Fischer.

Sipas radios së ushtrisë, ka mbetur vetëm një brigadë në Gaza, përkatësisht Brigada Nahal, e cila është përgjegjëse për sigurimin e korridorit të krijuar nga ushtria izraelite për të parandaluar kthimin e popullit të Gazës në veri.

Izraeli ka vrarë të paktën 33 mijë palestinezë, kryesisht gra dhe fëmijë, që nga sulmi i grupit palestinez Hamas më 7 tetor të vitit 2023 kur sipas Tel Avivit u vranë afër 1.200 njerëz. Sulmi ka shkaktuar një shkatërrim masiv, zhvendosje dhe mungesë të nevojave.

Luftimet mes Izraelit dhe Hezbollahut thuhet se janë më vdekjeprurëset që nga lufta e tyre në vitin 2006.