Huthit sulmojnë me raketë balistike objektivin ushtarak në Tel Aviv

Grupi Huthi në Jemen i mbështetur nga Irani njoftoi se ka bombarduar një objektiv ushtarak në jug të qytetit Tel Aviv në Izrael me një raketë balistike hipersonike dhe se operacioni "arriti me sukses qëllimin e tij", transmeton Anadolu.

Zëdhënësi ushtarak i grupit Huthi, Yahya Saree dha informacion mbi këtë çështje në një deklaratë me video të transmetuar në televizion.

"Ne shënjestruam një objektiv ushtarak që i përket armikut Izraelit në rajonin Jaffa të Palestinës së pushtuar me një raketë balistike hipersonike të tipit 'Palestine-2' dhe operacioni u krye me sukses", deklaroi Saree.

Ai theksoi se ky është operacioni i dytë në 24 orët e fundit. Saree tha se për sa kohë që sulmet amerikane ndaj Jemenit vazhdojnë, operacionet mbështetëse të forcave të armatosura të Huthive për Gazën nuk do të ndalen.

Saree tërhoqi vëmendjen se operacionet dhe ndalimi i lundrimit për anijet izraelite do të vazhdojë deri në përfundimin e sulmeve dhe heqjen e bllokadës në Gaza. Huthit njoftuan se dje kanë vënë në shënjestër aeroportin ndërkombëtar "Ben Gurion" në Tel Aviv të Izraelit dhe një aeroplanmbajtëse amerikane në Detin e Kuq.

- Sulmet ajrore amerikane në Jemen

Në një deklaratë më 7 mars, Huthit njoftuan se Izraelit i kanë dhënë katër ditë afat për të lejuar hyrjen e ndihmave në Gaza, në të kundërtën ata do të rifillonin operacionet detare kundër Izraelit.

Presidenti i SHBA-së, Donald Trump më 15 mars në një deklaratë në llogarinë e tij në platformën "Truth Social" tha se ka urdhëruar ushtrinë të fillojë "sulm masiv" kundër Huthive në Jemen.

Gjithashtu edhe lideri i Huthive, Abdul-Malik al-Houthi deklaroi se avionët dhe anijet luftarake amerikane do të jenë objektiv i Huthive dhe se për sa kohë që sulmet vazhdojnë, pengimi i lundrimit detar do të përfshijë edhe Washingtonin.

Huthit njoftuan se të paktën 53 njerëz u vranë dhe 107 të tjerë u plagosën në sulmet ajrore të kryera nga SHBA-ja dhe Britania e Madhe në disa qytete, përfshirë kryeqytetin Sana.