Hyn në fuqi armëpushimi Tajlandë-Kamboxhia pas luftimeve vdekjeprurëse

Marrëveshja e armëpushimit midis Tajlandës dhe Kamboxhias hyri sot në fuqi në mesnatë sipas kohës lokale (17:00GMT) pas luftimeve të fundit për kufijtë e diskutueshëm, transmeton Anadolu.

Zhvillimi erdhi pasi Tajlanda dhe Kamboxhia ranë dakord për një armëpushim “të menjëhershëm” dhe “të pakushtëzuar” pas bisedimeve të paqes në kryeqytetin malajzian Kuala Lumpur.

Kryeministri malajzian Anwar Ibrahim njoftoi armëpushimin pasi priti një takim midis kryeministrit kamboxhian Hun Manet dhe kryeministrit në detyrë të Tajlandës, Phumtham Wechayachai.

Armëpushimi u arrit pas konfliktit të armatosur përgjatë kufirit të diskutueshëm, i cili rezultoi në vdekjen e dhjetëra njerëzve, përfshirë ushtarë.

Fqinjët e Azisë Juglindore kanë një mosmarrëveshje kufitare përgjatë provincës Preah Vihear të Kamboxhias dhe provincës verilindore Ubon Ratchathani të Tajlandës, me tensione të përtërira që nga 28 maji, kur u vra një ushtar kamboxhian.