India instalon baterinë e parë të S-400 në rajonin Punjab

India ka vendosur në rajonin Punjab sistemin e parë raketor të mbrojtjes ajrore S-400 të prodhuar nga Rusia, transmeton Anadolu Agency (AA).

Sipas lajmit të "Hindustan Times", bateritë e para të sistemeve S-400 u instaluan në kuadër të bashkëpunimit të mbrojtjes ajrore mes Rusisë dhe Indisë.

Në një deklaratë nga Forcat Ajrore të Indisë thuhet se bateritë S-400 janë vendosur në rajonin Punjab të Indisë dhe se raketat prodhim rus do të rrisin kapacitetin e mbrojtjes ajrore të vendit.

Sistemi S-400 i mbrojtjes ajrore i instaluar në Punjab thuhet se ka kapacitetin për të goditur me 4 raketa të ndryshme avionët luftarakë, raketat balistike dhe avionët AWACS në distancën 250-400 kilometra, në distancën e mesme në 120 kilometra dhe në distancë të shkurtër në 40 kilometra.

Një zyrtar emri i të cilit nuk u bë i ditur ka thënë se sistemet e para që janë vendosur, kanë kapacitetin për të përballuar kërcënimet ajrore që mund të vijnë edhe nga Kina dhe nga Pakistani.

Sekretari i Jashtëm, Harsh Vardhan Shringla në fillim të këtij muaji njoftoi fillimin e dorëzimit të sistemeve raketore të mbrojtjes ajrore ruse.

Marrëveshja për blerjen e sistemeve raketore mes dy vendeve u nënshkrua në vitin 2015 ndërsa në vitin 2018 përfundoi marrëveshja me vlerë 4.5 miliardë dollarë.

Ministri i Jashtëm i Rusisë, Sergey Lavrov tha se javët e kaluara SHBA-ja ishte përpjekur të pengojë bashkëpunimin mes Rusisë dhe Indisë në fushën e sistemeve raketore të mbrojtjes ajrore S-400.