Italia rrëzon një dron të grupit Houthi në Detin e Kuq

Italia ka rrëzuar një dron të grupit Houthi të Jemenit, tha Ministria italiane e Mbrojtjes, transmeton Anadolu.

Shkatërruesi i marinës italiane Caio Duilio rrëzoi mjetin ajror pa pilot të Houthive në Detin e Kuq, tha Ministria në një deklaratë të shtunën vonë.

Në deklaratë thuhet se droni ishte 6 kilometra larg nga anija.

Në fillim të kësaj jave, Gjermania rrëzoi gjithashtu dy dronë të grupit Houthi në Detin e Kuq nga fregata e saj detare Hessen, e dislokuar në zonë si pjesë e misionit detar të BE-së Aspides për të mbrojtur anijet.

Grupi Houthi i Jemenit ka shënjestruar anije mallrash në Detin e Kuq në pronësi ose operim të kompanive izraelite ose që transportojnë mallra drejt dhe nga Izraeli në solidaritet me Rripin e Gazës, i cili ka qenë nën sulmet izraelite që nga 7 tetori.

Deti i Kuq është një nga rrugët detare më të përdorura në botë për dërgesat e naftës dhe karburantit.