Jordania dërgon avion me ndihma humanitare në Rripin e Gazës

Jordania ka njoftuar se dërgoi një avion me ndihma humanitare në Egjipt për në Rripin e Gazës, i cili është nën bllokadë të plotë dhe sulm intensiv nga Izraeli, transmeton Anadolu.

Në deklaratën me shkrim të Fondacionit të Bamirësisë Hashimite thuhet se avioni që transportonte kryesisht ilaçe dhe furnizime mjekësore është dërguar në Gaza me udhëzimet e mbretit Abdullah II të Jordanisë dhe në bashkëpunim me forcat e armatosura.

Gjithashtu theksohet se avioni u dërgua nën koordinimin e Egjiptit.

"Aeroplani fillimisht do të shkojë në Egjipt dhe do t'i dorëzohet autoriteteve shëndetësore në Gaza përmes Portës Kufitare Rafah", thuhet në deklaratë

Më 10 tetor, mbreti Abdullah II njoftoi se vendi i tij do të ofrojë ndihmë urgjente për Rripin e Gazës nëpërmjet Egjiptit.

- Konflikti Izrael-Palestinë

Krahu i armatosur i Hamasit, Brigadat Izz ad-Din al-Qassam, nisi një sulm gjithëpërfshirës ndaj Izraelit në mëngjesin e 7 tetorit, të quajtur "Tufani i Aksasë".

Ndërsa mijëra raketa u hodhën nga Gaza drejt Izraelit, grupet e armatosura palestineze bastisën dhe morën nën kontroll Portën Kufitare Beit Hanun-Erez në kufirin Gaza-Izrael.

Grupet e armatosura më pas hynë nga këtu në vendbanimet brenda Izraelit dhe ushtria izraelite nisi një sulm në Rripin e Gazës me dhjetëra avionë luftarakë.

Që nga atëherë, njoftohet se 1.300 izraelitë humbën jetën dhe 3.300 të tjerë u plagosën në sulmet e kryera nga Gaza.

Ministria palestineze e Shëndetësisë, nga ana tjetër, njoftoi se 1.203 palestinezë humbën jetën dhe 5.763 të tjerë u plagosën në Gaza nga sulmet e Izraelit.

Gjithashtu thuhet se 29 palestinezë vdiqën dhe rreth 150 njerëz u plagosën në sulmet e forcave izraelite dhe kolonëve hebrenj në Bregun Perëndimor.

Kombet e Bashkuara (OKB) i bënë thirrje Izraelit të hapë një korridor të ndihmës humanitare për Gazën dhe paralajmëroi se kushtet në rajon "mund të jenë më të rënda se kurrë më parë".