Kancelari gjerman: BE-ja nuk është as naive dhe as e pambrojtur

Kancelari gjerman, Friedrich Merz, ka paralajmëruar se Bashkimi Evropian (BE) nuk do të hezitojë të kundërpërgjigjet nëse SHBA-ja kërcënon përsëri me tarifa të reja, transmeton Anadolu.

“Nuk jemi as naivë dhe as të pambrojtur. Ne kemi instrumente në dispozicion”, u tha Merz drejtuesve ekzekutivë dhe përfaqësuesve të lartë të industrisë në Samitin Evropian të Industrisë në Antverp të Belgjikës.

“Për të kundërshtuar praktikat e padrejta, do t’i përdorim ato, nëse është e nevojshme”, theksoi kancelari gjerman.

Ai iu referua përplasjes së muajit të kaluar midis SHBA-së dhe vendeve evropiane lidhur me Grenlandën, duke theksuar se presidenti amerikan, Donald Trump, u tërhoq nga vendosja e tarifave shtesë pasi liderët e BE-së paraqitën një front të bashkuar.

“Mund të kujtoni se çfarë ndodhi gjatë asaj jave të famshme të Davosit”, tha Merz, duke iu referuar samitit urgjent të thirrur nga liderët evropianë për të përgatitur kundërmasa.

“Për sa kohë që qeveria amerikane ishte në rrugë për të zbatuar tarifa të reja ndaj partnerëve evropianë, ne ishim gati të vepronim”, tha ai.

“Nëse amerikanët nuk do të ishin tërhequr nga kërcënimi për tarifa të reja, ne ishim të gatshëm t’i zbatonim këto kundërmasa. Edhe një herë, nuk jemi naivë dhe nuk jemi të pambrojtur”, shtoi ai.

Ai theksoi se BE-ja është e fortë kur vepron e bashkuar.