Kolumbi, 14 të vdekur nga shembja e minierës së arit

Numri i viktimave nga shembja e minierës së arit në departamentin Narino, në jugperëndim të Kolumbisë, është rritur në 14, ndërsa shtatë persona të tjerë kanë mbetur të plagosur, përfshirë katër në gjendje të rëndë, njoftoi një zyrtar lokal, transmeton Anadolu.

Shembja ndodhi në një minierë të hapur ari përgjatë lumit Iscuande, në komunën Santa Barbara de Iscuande, në bregdetin e Paqësorit të Kolumbisë.

Alex Gonzalez, sekretar i paqes dhe të drejtave të njeriut në Narino, i tha Noticias Caracol se 13 trupa ishin nxjerrë në Santa Barbara de Iscuande, ndërsa trupi i një viktime tjetër ndodhej në komunën fqinje Guapi, në departamentin Cauca.

"Deri më tani, janë konfirmuar 14 viktima. Trembëdhjetë trupa janë nxjerrë në qytetin Santa Barbara de Iscuande, ndërsa një trup ndodhet në komunën Guapi. Përveç kësaj, shtatë persona janë të plagosur", tha Gonzalez.

Katër nga të plagosurit ishin në gjendje të rëndë, çka bëri që guvernatura e Narinos të koordinohej me Divizionin e Tretë të Ushtrisë Kolumbiane për të organizuar evakuimin e tyre me rrugë ajrore drejt Tumacos, ku do të merrnin trajtim mjekësor.

Gonzalez tha se aksidenti ndodhi kur u shemb një pjesë e minierës së hapur, duke i zënë poshtë punëtorët që ndodheshin në vendngjarje.

Zyra e Kombeve të Bashkuara për të Drejtat e Njeriut në Kolumbi u bëri thirrje të martën autoriteteve të përfshira në Sistemin Kombëtar të Menaxhimit të Rrezikut nga Fatkeqësitë që të ndërmarrin veprime për të mbështetur të plagosurit dhe familjet e prekura.

"Ne i bëjmë thirrje shtetit të zbatojë të gjitha masat e nevojshme parandaluese, përmes masave për transformimin e territoreve, si dhe hetimit dhe ndëshkimit të këtyre veprimtarive të paligjshme në territore, të cilat po prekin njerëzit që detyrohen të punojnë në këto hapësira pa asnjë lloj garancie, përveçse po shkaktojnë dëme në mjedis dhe në shëndetin e komuniteteve", tha organizata në platformën amerikane të rrjeteve sociale X.

Miniera ndodhet brenda territorit të Këshillit Komunitar të Pellgut të Lumit Iscuande.

Raportimet fillestare flisnin për nëntë viktima, por numri u rrit në 14 ndërsa vijonin përpjekjet e shpëtimit.

Gonzalez tha se operacionet e kërkimit kanë përfunduar dhe se nuk raportohet për persona të tjerë të zhdukur.