"Liberalizimi i vizave do të mbyllë pengesat midis Turqisë dhe BE-së"

BRUKSEL (AA) – Sekretarja e përgjithshme e Forumit të Turqisë të Parlamentit Evropian (PE), Laura Batalla, tha se liberalizmi i vizave për Turqinë do të mënjanojë “pengesën e madhe psikologjike” në lidhjet e vendit me Bashkimin Evropian (BE), raporton Anadolu Agency (AA).

Batalla, në një intervistë për AA tha se parashtrimi i dokumenteve të planit të punës së Turqisë që qytetarët turq të udhëtojnë në vendet e Shengenit pa viza do të ishte një hap pozitiv.

Më 7 shkurt, ministri turk i Çështjeve të BE-së, Ömer Çelik, tha se Ankaraja i kishte finalizuar këto draft dokumente për t’u parashtruar në bllok.

“Do të ishte e rëndësishme për rifillimin e procesit të dialogut për liberalizimin e vizave dhe ngritjen e marrëdhënieve midis Ankarasë dhe Brukselit”, theksoi Batalla.

Duke iu referuar takimit të ardhshëm Turqi-BE që do të mbahet në qytetin Varna të Bullgarisë, Batalla tha se takimi i liderëve më 26 mars do të ishte kritik për ri-krijimin e besimit të ndërsjelltë dhe për gjetjen e zgjidhjeve për problemet.

“Duhet të theksohet se Turqia është pjesë e Evropës”

Ndërkaq, sekretarja e përgjithshme e Fondacionit të Zhvillimit Ekonomik, Çigdem Nas, për AA tha se nuk duhet të pritet që menjëherë të arrihen rezultate për liberalizimin e vizave në Samitin në Varna të Bullgarisë.

“Turqia është pjesë e Evropës”, theksoi Nas, duke shtuar se Turqia duhet të shmangë rrezikun nga qëndrimi jashtë bllokut duke ndjekur nga afër diskutimet dhe planet për të ardhmen e BE-së pas Brexit-it.

Sipas një marrëveshjeje të rinjohjes BE-Turqi të nënshkruar në mars të vitit 2016, Ankaraja duhet të ripranojë të gjithë azilkërkuesit e parregullt që arrijnë në ishujt grekë nga Turqia.

Sipas marrëveshjes BE-Turqi, liberalizimi i vizave për qytetarët turq që udhëtojnë në vendet e zonës së Shengenit është një nga premtimet kryesore të BE-së.