Libi, forcat qeveritare konfiskojnë mjetet e blinduara të EBA-së

Njësitë ushtarake të Qeverisë së Pajtimit Kombëtar (GNA) në Libi, gjatë një operacioni kundër milicëve të Khalifa Haftarit, liderit të forcave të armatosura jolegjitime në lindje të vendit, konfiskuan mjetet e blinduara dhe kamionët e pajisur me armë të rënda që i përkasin Emirateve të Bashkuara Arabe (EBA), transmeton Anadolu Agency (AA).

Zëdhënësi i njësive të GNA-së, Muhammed Kanunu në një deklaratë me shkrim njoftoi se ata organizuan një operacion pasi lokalizuan milicët e Haftarit, të cilët shkelin armëpushimin në jug të Tripolit.

"Në operacionin e kryer sot konfiskuam 2 automjete të blinduara dhe 3 kamionë të pajisur me armë të rënda që i përkasin EBA-së. Gjithashtu kapëm një numër të madh të milicëve të armatosur të cilët janë shtetas të vendeve të ndryshme", tha Kanunu.

Ai thekson se milicët e Haftarit për të rikuperuar dëmin që pësuan, janë përpjekur të kundërpërgjigjen me sulme raketore ndaj vendbanimeve civile të Tripolit.

Milicët e Haftarit kohën e fundit kanë rritur sulmet e tyre me raketa kundër vendbanimeve në Tripoli. Si pasojë e këtyre sulmeve në tri ditët e fundit kanë humbur jetën 2 civilë dhe janë plagosur 17 të tjerë.