Liderja e Social Demokratëve suedezë merr sërish mandatin për formimin e qeverisë

Kryetari i parlamentit suedez, Andreas Norlen ka njoftuar se i ka dhënë sërish lideres së Social Demokratëve, Magdalena Andersson, mandatin për të formuar një qeveri të re, transmeton Anadolu.

Sipas raportit të gazetës "Dagens Nyheter", kryeparlamentari Norlen tha se mandati do të nisë të hënën, në mënyrë që partive t’u jepet fundjava për të shqyrtuar mundësitë e tyre. Ai tha se kushtet themelore kanë mbetur të pandryshuara që nga koha kur Andersson mori mandatin për herë të parë, duke e bërë të përshtatshme që ajo të rifillojë përpjekjet për formimin e qeverisë.

Andersson, e cila raportohet se u pajtua me Norlen, duhet të raportojë përsëri më 12 tetor, ndërsa më pas do të zhvillohet një votim për kryeministrin. “E lëmë pas turbulencën e javës së kaluar”, tha më tej Norlen, duke shtuar: “Nëse ju jepet një mandat, është mirë ta përfundoni atë”.

Pasi aleanca e Andersson-it fitoi shumicën e vendeve në zgjedhjet parlamentare të vendit më 13 shtator, ajo u ngarkua fillimisht në mesin e shtatorit që të shqyrtonte mundësinë e formimit të një qeverie të re.

Megjithatë, më vonë gjatë atij muaji, ajo hoqi dorë nga përpjekja, duke u shprehur se në atë moment nuk kishte mbështetjen e nevojshme parlamentare për të vazhduar.