Mbretëria e Bashkuar punon ngushtë me Türkiyen për rivendosjen e marrëveshjes së drithërave

Kryeministri britanik Rishi Sunak tha se Mbretëria e Bashkuar ka punuar ngushtë me Türkiyen për rivendosjen e Iniciativës së Drithërave të Detit të Zi, pasi zhvilloi një bisedë telefonike me presidentin ukrainas Volodymyr Zelenskyy, transmeton Anadolu.

"Ne do të vazhdojmë të përdorim rolin tonë si kryetar i Këshillit të Sigurimit të OKB-së për të dënuar më tej sjelljen e Rusisë", tha ai në deklaratë, duke shtuar:

"Rusia synon gjithnjë e më shumë të shënjestrojë anijet tregtare në zonën e Detit të Zi dhe Britania e Madhe po monitoron me kujdes situatën së bashku me partnerët tanë".

Në deklaratë thuhet se të dy liderët shkëmbyen mendime mbi përparimin e bërë nga forcat ukrainase, pavarësisht nga përballja me kushte sfiduese.

Sunak shprehu gjithashtu shqetësim të thellë mbi ndikimin shkatërrues të sulmeve të fundit ruse në qytetin e Odesës, duke thënë se ai ishte "i tmerruar" nga shkatërrimi i bërë nga zhvillimet e fundit.

Të dy udhëheqësit riafirmuan angazhimin e tyre për të mbështetur Ukrainën gjatë kësaj periudhe të vështirë.

"Mbretëria e Bashkuar vazhdoi të mbështesë nevojat e mbrojtjes ajrore dhe të artilerisë për Ukrainën me dorëzimin e më shumë municioneve dhe raketave", tha Sunak.

Javën e kaluar, Rusia u tërhoq nga marrëveshja e drithërave e Detit të Zi, duke thënë se nuk është zbatuar pjesa e marrëveshjes që ka të bëjë me Rusinë.

Marrëveshja, e nënshkruar fillimisht në korrik të vitit të kaluar në Istanbul nga Türkiye, OKB, Rusia dhe Ukraina, kishte për qëllim rifillimin e eksporteve të grurit nga portet ukrainase, të cilat ishin ndalur si rezultat i luftës Rusi-Ukrainë.