Më 5 janar rinisin negociatat ndërafgane

Faza e dytë e negociatave ndërafgane me militantët Talibanë, që filluan në Doha më 12 shtator për t'i dhënë fund luftës që ka vazhduar për gati 40 vjet në Afganistan, do të fillojë përsëri më 5 janar, transmeton Anadolu Agency (AA).

Gulam Farouk Majruh, anëtar i ekipit negociator të Afganistanit, u tha mediave se ekipi negociator i Afganistanit do të shkojë nesër në Katar për të vazhduar fazën e dytë të negociatave.

Duke deklaruar se delegacioni do të takohet me presidentin Ashraf Ghani sot, Majruh deklaroi se në këtë fazë, e cila do të vazhdojë në Katar, zbatimi i armëpushimit do të jetë çështja kryesore që do të paraqitet nga delegacioni i Afganistanit.

Hafiz Mansur, një anëtar tjetër i ekipit negociator të Afganistanit, vuri në dukje se me rinisjen e negociatave, militantët Talibanë mund të rrisin sulmet e tyre për të fituar më shumë koncesione.

Mansur deklaroi se te Talibanët ende ekziston ideja për të fituar pushtetin me forcë.

Procesi i paqes me Talibanët

Bisedimet e paqes midis qeverisë afgane dhe delegacionit Taliban filluan në Doha më 12 shtator dhe u pezulluan për shkak të mosmarrëveshjeve.

Pasi u arrit një marrëveshje mbi procedurën e negociatave me miratimin e të dy palëve, palët kaluan në fazën e dytë për përmbajtjen e bisedimeve kryesore të paqes.

Negociatat e fazës së dytë u pezulluan për 23 ditë me miratimin e palëve më 14 dhjetor.

Nëse negociatat e fazës së dytë përfundojnë pozitivisht, do të fillojnë bisedimet kryesore të paqes.