Në ujërat e Libisë shpëtohen mbi 100 migrantë të parregullt

Gjithsej 108 migrantë janë shpëtuar në ujërat e qytetit Sabrata të Libisë, bëri të ditur Zyra e Shtypit e Forcave Detare, transmeton Anadolu Agency (AA).

Sipas njoftimit, migrantët janë shpëtuar 17 milje në ujërat e qytetit Sabrata, gjegjësisht 70 kilometra në perëndim të kryeqytetit Tripoli.

Në mesin e migrantëve të kombësive të ndryshme gjenden 17 gra dhe 7 fëmijë.

Pas ndihmës së parë, migrantët janë dërguar në Administratën kundër Migrimit të Parregullt në Tripoli.

Libia, e cila po përjeton një boshllëk administrativ pas revolucionit, është një ndër rrugët e migrantëve afrikanë që duan të arrijnë në Evropë nëpërmjet Mesdheut për shkak të pozitës së saj të afërt gjeografike.

Një pjesë e afrikanëve që përpiqen të kalojnë shkretëtirën e Saharasë dhe Mesdheun nëpërmjet Libisë për të shkuar në Evropë bien në duart e trafikantëve të qenieve njerëzore ndërsa disa të tjerë humbin jetën në shkretëtirë ose në det.