Parlamenti i Algjerisë shënoi përvjetorin e masakrës së Parisit të vitit 1961

Duke hedhur poshtë deklaratat e diskutueshme të presidentit të Francës në lidhje me periudhën koloniale në Algjeri, parlamenti i vendit të shtunën tha se në një ditë të vetme në vitin 1961, rreth 300 algjerianë paqësorë u masakruan nga policia franceze, raporton Anadolu Agency (AA).

Një sesion special i Asamblesë Popullore Kombëtare, dhoma e ulët e parlamentit të Algjerisë, u mbajt për të shënuar 60-vjetorin e masakrës së 17 tetorit 1961 në Paris, kur demonstruesit paqësorë që mbështesnin lëvizjen e pavarësisë në vendin e tyre u sulmuan nga policia franceze.

Masakra, sipas kryetarit të parlamentit Ibrahim Boughali, mbetet një njollë e turpshme për Francën, sepse krimet kundër njerëzimit nuk kanë afat skadimi.

Në një deklaratë të Ministrisë së Informacionit të Algjerisë thuhet se demonstruesit algjerianë në Francë ishin civilë që iu nënshtruan brutalitetit, torturave dhe vrasjeve.

“Në një vend që në mënyrë jo të vërtetë tregton veten si mbrojtës i të drejtave të njeriut, ndërhyrja kundër demonstruesve la 300 të vdekur, përfshirë gra, fëmijë dhe të moshuar”, thuhet në deklaratë.

Kujtimi i masakrës së Parisit, kur demonstruesit u vranë dhe u hodhën në lumin Sena për mbështetjen e Luftës së Pavarësisë së Algjerisë, është ende gjallë pas 60 vjetësh, thuhet më tej.

Sipas deklaratës, Franca u përpoq të fshehte shkallën e masakrës për 37 vjet, duke njoftuar në mënyrë të rreme në vitin 1998 se vetëm 40 persona ishin vrarë në protesta.

Më 17 tetor 2001, 40 vjet pas masakrës, kryebashkiaku i Parisit ngriti një pllakë në Pont Saint-Michel në kujtim të viktimave.

Në fillim të këtij muaji, Emmanuel Macron, presidenti i Francës, tha: “Ndërtimi i Algjerisë si komb është një fenomen që ia vlen të shihet. A kishte një komb algjerian para kolonizimit francez? Kjo është pyetja”.

Këto komente u kritikuan nga udhëheqësit turq dhe të tjerët si një dredhi demagogjike përpara zgjedhjeve të vitit të ardhshëm.