Gözde Bayar
15 Prill 2024•Përditësim: 15 Prill 2024
Presidenti i Türkiyes, Recep Tayyip Erdoğan dhe Emiri i Katarit, Sheikh Tamim bin Hamad Al Thani, diskutuan marrëdhëniet dypalëshe dhe situatën humanitare në Gaza, transmeton Anadolu.
Sipas deklaratës së Drejtorisë së Komunikimeve të Presidencës Turke, liderët zhvilluan një bisedë telefonike, gjatë së cilës folën për lidhjet Türkiye-Katar, çështje globale dhe rajonale, ofensivën e vazhdueshme të Izraelit në Gaza dhe situatën humanitare në enklavën palestineze.
Nga ana e tij, Erdoğan nënvizoi nevojën për unitet në botën islame për të rritur përpjekjet drejt ndalimit të sulmeve të Izraelit në Rripin e Gazës dhe ndëshkimin e krimeve kundër njerëzimit që ka kryer gjatë ofensivës së vazhdueshme.
Presidenti turk shtoi se ishte jetike të frenohet Izraeli sa më shpejt të jetë e mundur dhe të veprohet në mënyrë pragmatike për të parandaluar përhapjen e tensioneve në rajon.
Liderët gjithashtu uruan njëri-tjetrin për festën muslimane të Fitër Bajramit të javës së kaluar.
Izraeli ka zhvilluar një ofensivë ushtarake vdekjeprurëse në Gaza që nga një inkursion ndërkufitar nga grupi palestinez Hamas më 7 tetor 2023, në të cilin Tel Avivi thotë se janë vrarë 1.200 njerëz.
Mbi 33.800 palestinezë, kryesisht gra dhe fëmijë, janë vrarë që atëherë në enklavë nga sulmet izraelite dhe rreth 76.500 të tjerë janë plagosur, përveç shkatërrimit në masë dhe mungesës së nevojave.
Izraeli akuzohet për gjenocid në Gjykatën Ndërkombëtare të Drejtësisë (GJND). Një vendim i përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
