Presidenti i Meksikës i mbijeton referendumit të parë në historinë e vendit

Meksikanët votuan për herë të parë në historinë e vendit nëse presidenti i tyre duhet të përfundojë pjesën tjetër të mandatit të tij në një referendum që përfundoi të dielën me pjesëmarrje të ulët, por me mbështetje të gjerë për Andres Manuel Lopez Obrador, raporton Anadolu Agency (AA).

Numërimi i shpejtë zyrtar raportoi mbështetje masive për Lopez Obrador. Autoritetet elektorale thonë se mbi 90 për qind e votave të hedhura kërkuan që presidenti të vazhdojë presidencën e tij për tre vitet e mbetura, me vetëm rreth 6.4-7.8 për qind që votuan për largimin e tij.

Megjithatë, pjesëmarrja e votuesve varionte nga 17 në 18.2 për qind, duke e bërë referendumin ligjërisht të pavlefshëm. Për të qenë votimi ligjërisht i detyrueshëm, referendumi kërkonte pjesëmarrjen e 40 për qind të elektoratit, apo 37 milionë votues.

Numri i përgjithshëm i votuesve është 92.8 milionë, që do të thotë se më shumë se 8 nga 10 qytetarë u përmbajtën nga pjesëmarrja në referendum.

Qytetarët meksikanë që jetojnë jashtë vendit mund të votonin online përmes Komisionit Elektronik të Votimit të Meksikës. Nga 17.809 votues të regjistruar, mbi 8.000 votuan. Sistemi zgjedhor raportoi mbështetje të gjerë për presidentin, me 76.31 për qind ose 6,324 vota në mbështetje të administratës së Lopez Obrador.

Për disa, referendumi ishte një mundësi për të mbështetur Lopez Obrador, presidenca e të cilit paraqet një ndryshim nga udhëheqësit e diskutueshëm dhe jopopullor në të kaluarën.

"Unë e mbështes presidentin tim pa kushte për gjithçka që ka bërë për vendin tonë, për mbrojtjen e burimeve të vendit tonë, për mbrojtjen e të varfërve, për kujdesin për njerëzit. Meksika kishte nevojë për një ndryshim", tha Alejandra Gomez Vicencio, një biznesmene dhe akademike nga Tijuana, Meksikë.

Ky nuk është referendumi i parë i shtyrë nga Lopez Obrador ku pati një nivel kaq të ulët të pjesëmarrjes së qytetarëve meksikanë. Për shembull, referendumi i mbajtur në korrik 2021 për të hetuar ish-presidentët për korrupsion kaloi me një pjesëmarrje prej 8 për qind.

Edhe pse Lopez Obrador gëzon mbështetje të gjerë në mesin e zgjedhësve të tij, kompania e anketave me bazë në SHBA "Morning Consult" doli me vlerësimin prej 66 për qind në mbështetje të presidentit, referendumi ka qenë premtimi i tij i fushatës, duke ngritur kritika nga kundërshtarët politikë.

Sipas analistëve politikë, qëllimi i Lopez Obrador ishte të konsolidonte pushtetin e tij politik duke arritur 30 milionë vota në mbështetje të presidencës së tij, të njëjtin numër votash që çuan në fitoren e tij në zgjedhjet presidenciale të 2018, duke demonstruar se ai nuk e ka humbur mbështetjen nga meksikanët.