Raisi fton presidentin e EBA-së, Bin Zayed për vizitë në Iran

Presidenti i Iranit, Ebrahim Raisi ftoi presidentin e Emirateve të Bashkuara Arabe (EBA) Mohammed bin Zayed për vizitë në Teheran, raporton Anadolu.

Ministri i Shtetit të EBA-së, Khalifa Shaheen Al Marar priti ambasadorin iranian në Abu Dhabi, Reza Amiri, njoftoi agjencia e lajmeve e Emirateve WAM. Ambasadori Amiri i përcolli ministrit Marar se presidenti i Iranit ka ftuar presidentin e EBA-së, Bin Zayed të vizitojë Iranin.

Ministri i Jashtëm iranian, Husein Emir Abdullahiyan vizitoi Katarin, Omanin, Kuvajtin dhe EBA-në në qershor dhe u takua me krerët e shteteve dhe zyrtarë të lartë të këtyre vendeve. Qeveria iraniane njoftoi se në prill, pas një ndërprerjeje shtatëvjeçare, emëroi ambasador në EBA.

Në janar të vitit 2016, 47 persona, përfshirë liderin fetar shiit Nimr al-Nimr, u ekzekutuan me akuzën për "terrorizëm" në Arabinë Saudite. Pas deklaratave të autoriteteve iraniane që reaguan ndaj ekzekutimeve, protestuesit iranianë i vunë zjarrin ambasadës saudite në Teheran dhe ndërtesave të konsullatës në qytetin Mashhad.

Pas kësaj, Arabia Saudite, Bahreini, Kuvajti dhe Sudani ndërprenë marrëdhëniet diplomatike me Iranin ndërsa EBA-ja reduktoi marrëdhëniet e saj në nivelin e të ngarkuarit me punë dhe tërhoqi Seyf Muhammed Ubeyd ez-Zeabi, i cili mbante postin e ambasadorit në Teheran.

Si rezultat i bisedimeve mes dy vendeve, Seyf Muhammed Ubeyd ez-Zeabi, i cili u ftua në vendin e tij në vitin 2016 ndërsa ishte ambasador i EBA-së në Teheran, erdhi në Iran më 9 shtator 2022 për të rifilluar detyrën e tij pas një pauze shtatë vjeçare.