Rusia thotë se pengoi 6 sulme ukrainase me dronë në Moskë dhe Krime

Rusia pretendoi se mbrojtja e saj ajrore pengoi gjashtë sulme me dronë ukrainas në Moskë dhe Gadishullin e Krimesë sot herët, transmeton Anadolu.

“Më 17 shtator, rreth orës 1:45 me orën e Moskës (2245 GMT), u pengua një përpjekje e regjimit të Kievit për të kryer një sulm terrorist me dron ndaj objekteve në territorin e Federatës Ruse”, tha Ministria ruse e Mbrojtjes në një deklaratë.

Sistemet ruse të mbrojtjes ajrore rrëzuan një dron ukrainas mbi rrethin Istrinsky të rajonit të Moskës, thuhet në deklaratë.

Një deklaratë e mëvonshme pretendon se katër dronë të tjerë ukrainas u shkatërruan nga sistemet ruse të mbrojtjes ajrore në 35 minutat në vijim mbi brigjet veriperëndimore dhe lindore të Gadishullit të Krimesë, të cilin Moska e aneksoi ilegalisht në vitin 2014.

Në orët në vijim, Kievi tentoi një tjetër sulm me dron ndaj objektivave në territorin rus. Sistemet ruse të mbrojtjes ajrore interceptuan dhe shkatërruan dronin mbi rrethin Domodedovo të Moskës, tha më tej ministria.

Sulmet me dronë brenda Rusisë janë rritur në mënyrë dramatike muajt e fundit, ndërsa autoritetet ruse akuzojnë Ukrainën.

- Raketat ruse goditën Odesën e Ukrainës

Ndërkohë, Komanda e Forcave Ajrore të Ukrainës pretendoi se Rusia goditi me raketa një objekt bujqësor civil në rajonin jugor të Odesës.

Ushtria ruse kreu sulmet gjatë natës në territorin ukrainas duke përdorur raketa kryqëzuese dhe dronë, thuhet në një deklaratë.

Forcat e mbrojtjes ukrainase identifikuan gjithsej 16 objektiva ajrore, kryesisht të fokusuara në Odesa, dhe interceptuan dhe shkatërruan 12 prej tyre, duke përfshirë gjashtë raketa kryqëzuese, shton deklarata.

Sulmi ka shkaktuar dëme në infrastrukturën bujqësore në Odesa, por nuk ka shkaktuar viktima.

Nga gjashtë dronë të rrëzuar, katër u goditën në rajonin Mykolaiv dhe dy mbi Odesa, tha Komanda e Forcave të Mbrojtjes Jugore të Ukrainës.