SHBA mirëpret hapat Turqi-Armeni për normalizimin e marrëdhënieve

SHBA-ja sot ka përshëndetur nismat aktuale të Turqisë dhe Armenisë për të filluar diskutimin e hapave për normalizimin e marrëdhënieve, transmeton Anadolu Agency (AA).

“Mirëpresim dhe mbështesim fuqishëm deklaratat e ministrit të Jashtëm turk Mevlüt Çavuşoğlu dhe Ministrisë së Jashtme të Armenisë për emërimin e të dërguarve të posaçëm për të diskutuar mbi procesin e normalizimit”, shkroi në Twitter, sekretari i Shtetit të SHBA-së, Antony Blinken.

Ministri Çavuşoğlu të hënën tha se Ankaraja dhe Jerevani do të emërojnë së shpejti të dërguar të posaçëm për të diskutuar hapat për normalizimin e marrëdhënieve.

Më vonë, Vahan Hunanyan, një zëdhënës i Ministrisë së Jashtme armene, përshëndeti njoftimin e ministrit të Jashtëm turk, sipas Radios Publike të Armenisë.

“Në këtë aspekt, vlerësojmë pozitivisht deklaratën e ministrit të Jashtëm turk për emërimin e një përfaqësuesi special për normalizimin e marrëdhënieve dhe konfirmojmë se pala armene do të emërojë një përfaqësues special për këtë dialog”, raportoi transmetuesi, duke cituar Hunanyan.