SHBA, të paktën 3 të vdekur nga tornadot në Arkansas

Të paktën tre persona kanë vdekur dhe dhjetëra të tjerë janë shtruar në spital pasi disa tornado goditën të premten në shtetin amerikan Arkansas, njoftuan mediat, transmeton Anadolu.

Tornadot goditën kryeqytetin e shtetit Little Rock dhe qytetin Wynne, duke shkatërruar shtëpi, duke rrokullisur automjete dhe duke shkulur pemë nga toka.

Pamjet nga qyteti Wynne shfaqin stuhinë duke rrafshuar blloqe të tëra banimi.

Qyteti u “përgjysmua nga dëmtimi nga lindja në perëndim”, tha kryebashkiakja Jennifer Hobbs për CNN.

Ajo tha se ekipet e emergjencës po punojnë ende për të përcaktuar ashpërsinë e dëmit dhe për të vlerësuar nëse ka viktima apo lëndime të tjera.

Shërbimi Kombëtar i Motit lëshoi dhjetëra paralajmërime për tornado në gjithë jugun dhe perëndimin e mesëm që mund të prekin miliona banorë nga Tennessee dhe Kentucky në Alabama dhe Mississippi në Illinois, Indiana dhe Michigan.

Po ashtu janë lëshuar paralajmërime për stuhi me breshër dhe shira të dendur në ato shtete.

Raundi i fundit i motit të ashpër vjen një javë pasi një seri stuhish vdekjeprurëse shpërtheu në juglindje, me një tornado që vrau të paktën 26 njerëz në Rolling Fork, Mississippi.