Ushtarët izraelitë arrestojnë dhjetëra palestinezë të tjerë në Bregun Perëndimor

Ushtarët izraelitë arrestuan edhe 30 palestinezë të tjerë në bastisjet që kryen në Bregun Perëndimor nën pushtim, transmeton Anadolu.

Në një deklaratë të përbashkët nga Shoqata e të Burgosurve Palestinezë dhe Delegacioni për të Burgosurit dhe të Liruarit të lidhur me Organizatën për Çlirimin e Palestinës thuhet se ushtria izraelite vazhdon bastisjet e saj në Bregun Perëndimor dhe në Kudsin Lindor nën pushtim.

Theksohet se të paktën 30 palestinezë u arrestuan në bastisjet që ushtria izraelite ka kryer në rajone të ndryshme të Bregut Perëndimor gjatë orëve të natës dhe të mëngjesit.

Numri i palestinezëve të arrestuar nga Izraeli në Bregun Perëndimor dhe Kudsin Lindor që nga 7 tetori 2023 ka tejkaluar mbi 10 mijë.

Në deklaratë thuhet gjithashtu se këto të dhëna nuk përfshijnë ndalimet në Rripin e Gazës, "shifrat e të cilëve shprehen me mijëra".

Që nga 7 tetori 2023, kur ushtria izraelite filloi sulmet në Rripin e Gazës, ka patur rritje të arrestimeve, bastisjeve dhe sulmeve kundër palestinezëve në Bregun Perëndimor të pushtuar dhe Kudsin Lindor.