Erdoğan: Nga fillimi i operacionit janë neutralizuar 3.747 terroristë

GIRESUN (AA) - Presidenti i Turqisë, Recep Tayyip Erdoğan deklaroi sot se që nga fillimi i operacionit "Dega e Ullirit" në rajonin veriperëndimor sirian të Afrinit në total janë neutralizuar 3.747 terroristë, raporton Anadolu Agency (AA).

Erdoğan iu drejtua të pranishmëve në kongresin e rregullt të partisë turke në pushtet për Zhvillim dhe Drejtësi (Partia AK) në Giresun duke njoftuar se forcat e armatosura turke kanë vendosur kontroll në të gjithë rajonin e Afrinit.

Operacioni në Afrin nisi më 20 janar në përputhje me të drejtat turke të bazuara në të drejtën ndërkombëtare dhe rezolutat e Kombeve të Bashkuara. Turqia gjithashtu i referohet nenit 51 të marrëveshjes së OKB-së, përkatësisht "të drejtës për vetëmbrojtje". Operacioni zhvillohet duke respektuar integritetin territorial të Sirisë.

Erdoğan sot njoftoi vazhdimin e luftës vendimtare kundër terrorizmit.

Ai theksoi se forcat turke kanë mbështetje të madhe në operacione nga Ushtria e Lirë Siriane, ku 614 luftëtarë të së cilës u vranë në operacionin e vitit të kaluar "Mburoja e Eufratit" dhe të paktën 302 luftëtarë u vranë në operacionin "Dega e Ullirit" në Afrin.