Ayşe Aktaş
13 dhjetor 2017•Përditësim: 13 dhjetor 2017
ANKARA (AA) – Ministria e Punëve të Jashtme e Republikës së Turqisë, është shprehur se deklaratat e këshilltarit të Shtëpisë së Bardhë për Sigurinë Kombëtare, Herbert Raymond McMaster, janë të pabaza dhe të papranueshme, transmeton Anadolu Agency (AA).
MPJ e Turqisë ka reaguar nëpërmjet një deklarate kundër pretendimeve të McMaster-it se "Turqia po mbështet ideologjitë radikale".
Duke u theksuar se deklaratat e McMaster të cilat si objektiv kanë marrë Turqinë dhe qeverinë e saj janë pritur me trishtim, në deklaratën nga MPJ e Turqisë thuhet se “Deklaratat e këshilltarit të Sigurisë Kombëtare McMaster, i cili është në një pozitë ku duhet të dijë më së miri se si shteti jonë lufton me të gjitha dimensionet e terrorizmit dhe radikalizmit, nuk kanë asnjë lidhje me të vërtetën dhe janë të habitshme, të pabaza dhe të papranueshme”.
“Jemi në pritje që SHBA-ja, të cilën vazhdojmë ta shohim si një shtet mik dhe aleat, të tregojë qasjen e njëjtë për shtetin tonë dhe që në përputhje me legjitimitetin ndërkombëtar dhe marrëdhëniet tradicionale të aleatëve, të japë mbështetje më konkrete dhe aktive në luftën e vendosur të shtetit tonë kundër terrorizmit dhe radikalizmit, duke lënë anash mbështetjen e dhënë për organizatat terroriste të çfarëdo lloji qofshin, si YPG-ja”, thuhet në deklaratë.
