Turqia do të dërgojë ndihmë mjekësore në Venezuelë

Turqia do të dërgojë ndihmë mjekësore në Venezuelë në kuadër të një marrëveshjeje bilaterale midis dy vendeve, transmeton Anadolu Agency (AA).

Sipas një njoftimi të botuar në Gazetën Zyrtare të Turqisë, marrëveshje Turqi-Venezuelë për "donacionin në fushën e shëndetësisë" u nënshkrua më 11 qershor në Ankara.

"Si një gjest miqësie dhe dashamirësie", Turqia do të dhurojë pajisje mjekësore, përfshirë 25 ventilatorë, 100 mijë maska kirurgjikale, 50 mijë maska të tipit N95, 35 mijë veshje mbrojtëse, 200 mijë doreza dhe 40 mijë pajisje testimi.

Turqia ka dërguar ndihmë mjekësore në rreth 140 vende për t'i ndihmuar ata të luftojnë pandeminë e koronavirusit të ri (COVID-19).

Pas shfaqjes për herë të parë dhjetorin e kaluar në Kinë, pandemia është përhapur në mbarë botën, ndërsa SHBA, Brazili, India dhe Rusia janë vendet më të prekura nga virusi.

Sipas të dhënave nga Universiteti John Hopkins me qendër në SHBA, në të gjithë botën janë konfirmuar mbi 18.5 milionë raste me koronavirus, prej të cilëve mbi 11 milionë janë shëruar dhe mbi 700 mijë kanë humbur jetën.