Ekip
09 Tetor 2020•Përditësim: 12 Tetor 2020
Zvicra ka shënuar një rekord të ri ditor me gjithsej 1.487 raste të koronavirusit të ri (COVID-19) të regjistruara gjatë 24 orëve të fundit, duke shkaktuar shqetësime për një rritje të infeksioneve në qytetin e dytë më të madh të vendit, Gjenevë, transmeton Anadolu Agency (AA).
Sipas zyrës federale zvicerane të Shëndetit Publik, rastet COVID-19 kanë kulmuar gjatë pesë ditëve të fundit, duke arritur në nivelin më të lartë që nga shpërthimi i pandemisë.
Zyra federale njoftoi se gjatë 24 orëve të fundit janë kryer 15.229 teste të dyshuara për COVID-19, me një normë prej 9,8 për qind të rasteve pozitive.
Tre pacientë po ashtu kanë vdekur nga koronavirusi gjatë ditës së fundit.
Që nga shpërthimi i pandemisë, numri i personave të infektuar me koronavirus në vend ka arritur në 60.368, përfshirë 1.793 vdekje.
Në këtë vend me rreth 8.5 milionë banorë, janë kryer gjithsej 1.47 milionë teste të dyshuara.
Ndër ata që rezultuan pozitiv në Gjenevë është edhe Filippo Grandi, komisioneri i lartë i Kombeve të Bashkuara (OKB) për të drejtat e njeriut, i cili udhëheq Agjencinë e OKB-së për Refugjatët.
Zyrtarja e lartë rajonale e shëndetësisë, Algae Tardin, tha se situata e përkeqësuar në Gjenevë është jashtëzakonisht shqetësuese.
Aktualisht 50 pacientë të prekur nga koronavirusi po trajtohen në Spitalin Universitar të Gjenevës (HUG).
"Ekziston një çështje madhore shqetësuese me ahengjet private, bashkimet familjare dhe shoqërimet me miqtë", tha Tardin para gazetarëve në Gjenevë.
