Takimi ministror franko-gjerman shtyhet për në janar

Takimi i Këshillit të Ministrave Franko-Gjerman i planifikuar për javën e ardhshme në Paris është shtyrë për në janar, tha zëdhënësi i qeverisë gjermane Steffen Hebestreit para gazetarëve në Berlin, raporton Anadolu Agency (AA).

Hebestreit përmendi mospërputhjet e orareve të disa prej ministrave dhe nevojën e vazhdueshme për koordinim mbi “çështjet dypalëshe” si arsye për shtyrjen, por nuk dha detaje të mëtejshme.

Pavarësisht, në samitin e BE-së në Bruksel këtë të enjte dhe të premte, një takim midis kancelarit Olaf Scholz dhe presidentit francez Emmanuel Macron është caktuar në mënyrë të vendosur, ripohoi Hebestreit.

Ekzistojnë gjithashtu mundësi që Scholz të udhëtojë në Paris pa asnjë ministër tjetër të kabinetit për një takim tjetër me Macron-in të mërkurën e ardhshme.

Zhvillimet e fundit vijnë mes raportimeve të mediave për tensionimin e marrëdhënieve mes Parisit dhe Berlinit si pasojë e mosmarrëveshjeve për çështjet e energjisë dhe mbrojtjes.

Scholz dhe Macron, si dhe kabinetet e tyre, do të takoheshin në Paris të mërkurën e ardhshme për këshillin e tyre vjetor ministror franko-gjerman – takimi i parë i tillë që kur koalicioni trepartiak i qendrës së majtë të Scholz-it mori detyrën në fund të vitit të kaluar.