Dita e fundit e transferimeve regjistron lëvizje të mëdha në ligat evropiane

Klubet kryesore në ligat evropiane derdhën para në ditën e përfundimit të afatit të transferimit për të forcuar skuadrat e tyre për sezonin 2021-2022, transmeton Anadolu Agency (AA).

Një lëvizje 'tronditëse' u përmbyll nga Atletico Madrid kur nënshkruan me ish-lojtarin e saj Antoine Griezmann në huazim nga Barcelona me një mundësi për të vazhduar edhe për një vit tjetër.

Ylli ndërkombëtar francez aktualisht është golashënuesi i pestë më i mirë i të gjitha kohërave i Atletico Madridit duke shënuar 133 gola në 257 ndeshje, fitues i Superkupës Spanjolle, Ligës Evropiane dhe Super Kupës UEFA në paraqitjen e tij të parë në Madrid.

Barcelona zëvendësoi Griezmannin me sulmuesin holandez Luuk de Jong nga Sevilla në huazim me një opsion për një transferim të përhershëm në fund të sezonit.

Një tjetër gjigant i La Ligës, Real Madridi përmbylli ditën e fundit të afatit për transferime pasi bleu mesfushorin premtues të Rennes, Eduardo Camavinga.

Futbollisti 18-vjeçar francez nënshkroi marrëveshje gjashtëvjeçare që do ta mbajë atë në stadiumin "Santiago Bernabeu" deri më 30 qershor 2027.

Kampionët në fuqi të Ligës së Kampionëve Chelsea e përforcuan skuadrën e tyre në ditën e përfundimit të afatit të transferimit duke nënshkruar me mesfushorin spanjoll Saul Niguez nga Atletico Madridi në një marrëveshje huazimi një sezon me mundësinë e blerjes.

Niguez shënoi fitore të mëdha në Atletico Madrid, ku ngriti titullin në La Liga, Copa del Rey, Superkupën e Spanjës, Superkupën e UEFA-s dhe dy trofe të Ligës së Evropës.

Tottenham Hotspur konfirmoi nënshkrimin me mbrojtësin brazilian Emerson Royal nga Barcelona në një marrëveshje pesëvjeçare.

Skuadra angleze e Premier Ligës gjithashtu njoftoi largimin e lojtarit nga Bregu i Fildishtë, Serge Aurier pasi prishën kontratën në mënyrë reciproke.