Önder Beyter
09 Nîsan 2018•Rojanekirin: 10 Nîsan 2018
PARÎS
Hat ragihandin ku Serokomarê Fransayê Emannuel Macron di peywendiya ligel Serokê Amerîkayê Donald Trump da êrişa kîmyayî ya ku li Sûriyeyê hat kirin, şermezar kir û herwiha herdu serokan biryar wergirt ku di nava 48 saetan da cardin bi hev ra peywendiyê daynin û telîmat dan rayedaran da ku lêkolînên xwe yên der heqê êrişê da berfirehtir bikin
Di daxuyaniya nivîskî ya Qesra Serokomariya Fransayê Elyseeyê da hat destnîşankirin ku Macron û Trump di peywendiyeke bi têlefonê da li ser mijara Sûriyeyê rawestiyan.
Di daxuyaniyê da hat diyarkirin ku Macron, êrişa kîmyayî ku di 7ê nîsanê da li Xûtaya Rojhilat li dijî gel hat kirin, bi awayekî herî tund şermezar kir.
Di daxuyaniyê da herwisa hat balkişandin ku Macron û Trump analîz û zanyariyên li cem xwe yên ku êrişa kîmyayî piştrast dikin, bi hev ra parve kirin û telîmat dan ekîbên xwe da ku di rojên pêşiya me da parvekirina analîz û zanyariyan zêde bikin.
Herwiha hat destnîşankirin ku herdu serokan biryar wergirt ku li Konseya Ewlekariyê ya Neteweyên Yekbûyî (KENY) ku wê îro bicive, ji bo şermezarkirina binpêkirina biryara 2401ê û dubare emilandina çeka kîmyayî, înîsiyatîf û çalakiyên xwe bi awayekî hevbeş bidomînin û di vê çarçoveyê da herdu serokan li ser wê yekê li hev kirin ku di nava 48 saetan da careke din peywendiyê daynin.
Di daxuyaniya Elyseeyê da nehat destnîşankirin ku bê ka yê ku êrişa li Xûtaya Rojhilat kir, kî ye.
Li Sûriyeyê li navçeya Dûmayê ku li Xûtaya Rojhilat ciyê dawîn e ku di kontrola mixalifan da ye, rejimê bi çeka kîmyayî êrişî warê sivîlan kiribû û 78 sivîl hatibûn kuştin.
