تورکیا و سعوودیە رێککەوتننامەیەکیان لە بواری وەبەرھێنانی وزەی خۆر واژوو کرد

ڕیاز ــ AA

وەزیری وزە و سەرچاوە سرووشتییەکانی تورکیا، ئاڵپارسلان بایراکتار ڕایگەیاند کە بە بەھای دوو ملیار دۆلار، رێککەوتننامەیەکیان لە بواری وەبەرھێنانی وزەی خۆر لەگەڵ سعوودیە واژوو کردووە.

ڕێککەوتننامەکە لەلایەن وەزیری وزە و سەرچاوە سرووشتییەکانی تورکیا، ئاڵپارسلان بایراکتار وھاوتا سعوودییەکەی، عەبدولعەزیز بن سەلمان بن عەبدولعەزیز لە بارەگای وەزارەتی وزەی سعوودیە لە ڕیاز لەژێر ناوی: "ڕێککەوتننامەی حکوومەت لەسەر پرۆژەکانی وێستگەی وزەی نوێبووەوە"، واژووکراوە.

ئاڵپارسلان بایراکتار دوای واژووکردنی ڕێککەوتننامەکە لە لێدوانێکی ڕۆژنامەوانییدا ئاماژەی بەوەداوە کە بەھای ڕێککەوتننامەکە، دوو ملیار دۆلارە و ڕاشیگەیاند کە ئامانجی زیادکردنی قەبارەی بازرگانی و وەبەرھێنان لە نێوان ھەردوو وڵاتدا بەدی ھاتوو، ئەمەش بەھۆی ئەو تێڕوانینەی کە سەرکۆمار ئەردۆغان و جێنشینی سعوودیە، محەمەد بن سەلمان پێشکەشیان کرد.

باسی لەوەش کرد کە تورکیا لە بواری وزەی نوێبووە، ئامانجی گەورەی ھەیە.

ھەروەھا ڕاشیگەیاند کە لە چوارچێوەی ڕێککەوتننامەکەدا، ژمارەیەک وێستگەی بەرھەمھێنانی کارەبا لە ڕێگای وزەی خۆرەوە لە لەلایەن کۆمپانیاکانی سعوودیە لە تورکیا دروست دەکرێن.