مەسرور بارزانی بڕی ٥٠٠ ملیار دیناری بۆ ئاوەدانکردنەوە راگەیاند

هەولێر - AA

سەرۆکوەزیرانی ھەرێمی کوردستان، مەسرور بارزانی بڕی پێنج سەد ملیار دینار کە دەکاتە چوار سەد و بیست ملیۆن دۆلاری ئەمریکی بۆ بونیادنان و گەشەپێدانی ژێرخانی ئابووری ھەرێمی کوردستان راگەیاند.

بەپێی هەواڵێکی نووسینگەی راگەیاندنی سەرۆکی حکوومەتی هەرێمی کوردستان، ئەمڕۆ پێنجشەممە، سەرۆکوەزیرانی ھەرێمی کوردستان، مەسرور بارزانی بڕی پێنج سەد ملیار دینار کە دەکاتە چوار سەد و بیست ملیۆن دۆلاری ئەمریکی بۆ بونیادنان و گەشەپێدانی ژێرخانی ئابووری ھەرێمی کوردستان و بەتایبەتیش لە بوارەکانی رێگاوبان، سایلۆ، کارەبا و ئاو و ئاوەڕۆ راگەیاند.

لە هەواڵەکەدا ئاماژە بەوەکراوە کە ئەم پڕۆژانە بە چەند قۆناغێک ئەنجام دەدرێن و سەرتاسەری ھەرێمی کوردستان دەگرێتەوە و ھەزاران دەرفەتی کار لە ھەرێمی کوردستان دەرەخسێنێت، لەم چوارچێوەیەشدا ئەمڕۆ بەردی بناغەی ئەندەرپاسەکانی شەقامی بارزان لە دھۆک دادەنرێت.