مێرکڵ لە ھەڵبژاردن رووبەڕووی شکست بووەوە

بەرلین

راوێژکاری ئەڵمانیا ئەنگێلا مێرکڵ رایگەیاند: "ھەڵبژاردنەکانی دوێنێ دڵخۆشکەر نەبوو بۆ پارتی یەکێتی دیموکراتی کریستیان و ئەنجامێکی نەخوازراوی ھێنایە ئاراوە".

مێرکڵ لەگەڵ سەرۆکی رێکخستنی پارتەکەی لە ویلایەتی بەرلین کۆنگرەیەکی رۆژنامەوانی ساز کرد و رایگەیاند پارتەکەی نزیکەی سەدا شەش لە دەنگەکانی لەدەست داوە و بە ئەنجامێکی خراپ وەسف کرد.

راوێژکاری ئەڵمانیا گوتی: "ھەڵبژاردنەکانی دوێنێ دڵخۆشکەر نەبوو بۆ پارتی یەکێتی دیموکراتی کریستیان و ئەنجامێکی نەخوازراوی ھێنایە ئاراوە. وەک سەرکردەی پارتەکە و سەرۆکوەزیران بەرپرسیارێتی خۆم لێرەدا ھێناوەتەجێ".

مێرکڵ تیشکی خستە سەر لێدوانەکانی خۆی لەبارەی پەنابەران کە بە "شکستخواردوو" وەسفی دەکەن و لەوبارەیەوە رایگەیاند لێدوانەکانی لێکدانەوەی جیاوازی لەبارەیەوە دەکرێت و جارێکی دیکە نایەوێت باسی بکات.

راوێژکاری ئەڵمانیا ئەوەشی خستەڕوو کە لەم ساڵانەی دواییدا کەموکورتییان لەبارەی کێشەی پەنابەرانەوە ھەبووە و گوتیشی: "ئەگەر لەدەستم بێت، دەگەڕێینەوە رابردوو بۆ ئەوەی حکوومەتی ئەڵمانیا و لایەنە پەیوەندیدارەکان لە ھاوینی ٢٠١٥ خۆیان باشتر بۆ ئەو دۆخە ئامادە بکەن".

مێرکڵ جەختی لەوەش کردەوە سەرەڕای رەخنەکان لە کارێکی زۆریش سەرکەوتوو بوون و راشیگەیاند ھەروەک ساڵی رابردوو ئەڵمانیا بەرەنگاری کاری بێ ناو تۆمارکردنی پەنابەران دەبێتەوە.

راوێژکاری ئەڵمانیا لە کۆتایی قسەکانیدا ئاماژەی بەوەش دا کە دوای داخرانی رێگەی وڵاتانی باڵکان و بە تایبەتیش رێککەوتننامەی نێوان یەکێتی ئەورووپا و تورکیا، ژمارەی ھاتنی پەنابەران بۆ وڵاتەکەی کەمی کردووەتەوە و راشیگەیاند سەرەڕای بوونی رەخنەکان، بەڵام رێککەوتننامەکە گرنگی خۆی ھەیە و کارێکی مەنتقی بووە.