ئیستانبوڵ.. رووداوێکی هاتوچۆ گیانلەدەستدانی سێ کەسی لێکەوتەوە

ئیستانبوڵ - AA

لەسەر رێگای خێرای ماڕماڕای باکوور، پاسێکی نەفەر هەڵگر وەرگەڕا، بەپێی ئامارە بەراییەکان سێ کەس گیانیان لەدەستداوە و ١٨ کەسیش برینداربوون.

پاسەکە کە لە چەرکەزکۆی-یەوە بەرەو ئایدن دەچوو، لەڕێگەی عومرانییە لە کۆنترۆڵ دەرچوو و وەرگەڕا.

دوا بە دوای رووداوەکە ژمارەیەکی زۆر ئۆتۆمبێلی فریاکەوتن، ئافاد و تیمی ئاگرکوژێنەوە گەیشتنە شوێنی رووداوەکە.

لە رووداوەکەدا، ژمارەیەک لە سەرنشینان گیریان خوارد کە دواتر لەلایەن تیمی ئاگرکوژێنەوەوە رزگار کران و هەندێکیشیان توانیان بێنە دەرەوە.

هەریەک لە شۆفێری پاسەکە و سەرنشینێک لە شوێنی رووداوەکە گیانیان لەدەست دا و سەنشینێکی دیکە لە نەخۆشخانە گیانی لەدەست دا.

لە دوای چارەسەری سەرەتایی بریندارەکان کە ژمارەیان ١٨ کەس بوو گواسترانەوە بۆ نەخۆشخانەکانی ناوچەکە.

تەرمی ئەو کەسانەی لە رووداوەکەدا گیانیان لەدەستداوە دوای لێکۆڵینەوە و گواسترانەوە بۆ پزیشکی دادوەریی.

کاری تیمەکان لە شوێنی رووداوەکە درێژەی هەیە و رێگاکە بەڕووی هاتوچۆدا داخراوە.