ئەردۆغان: "ھەرگیز مەیدان چۆڵناکەین"

ئیستانبوڵ - AA

سەرکۆماری تورکیا، رەجەب تەیب ئەردۆغان رایگەیاند "جارێکی دیکە ئەوانەی بەدوای ھەلێکدا دەگەڕێن بۆ تێکدانی جوانییەکانی ئەم شارە(ئیستانبوڵ) و ئەم وڵاتە، نائومێد دەبن. ھەرگیز مەیدانەکان بۆ ئەوانە چۆڵناکەین کە دەیانەوێت رووناکیی فەتح لە سەر بەرزاییەکان و نێو پەرستگا و ماڵەکانی ئیستانبوڵدا بکوژێننەوە. ئیستانبوڵ سەرشۆڕ و ملکەچ ناکەین. تا کۆتایی بەرگری لە یەکڕیزی و پێکەوەژیانی گەلەکەمان دەکەین. بەگیانمان بەرگری لە یەکپارچەیی وڵاتەکەمان دەکەین. بۆ مانەوەی دەوڵەتەکەمان، لەھیچ فیداکارییەک سڵ ناکەینەوە".

سەرکۆماری تورکیا،گوتی: "نیشتمانیبوون؛ واتا بەرزکردنەوەی داھاتی نیشتمانی، گەورەکردنی کاری گەل. واتا ئەو پارەیەی کە دەچێت بۆ سوو بیکەیتە وەبەرھێنان و لە رێگەی ھاوکاری کۆمەڵایەتییەوە بیگوازیتەوە بۆ گەل. ناوخۆییبوون؛ واتا کاتێک تورکیا پێویستی بە پێنج سەنت بوو لە بەردەم دەرگای بانکی نێودەوڵەتیدا نەیخەیتە چاوەڕوانیەوە. لە پیشەسازی بەرگریدا وابەستەی دەرەوەی نەبیت".

ئەردۆغان گوتیشی: "ئەی ھاووڵاتییانی خۆشەویست، ئەگەر نەمانەوێت کارەساتی تانکەرەکانی گەرووی ئیستانبوڵ ببینین، ئەگەر نەمانەوێت کارەساتەکانی رابردوو ببینین، با وەبیرتانبھێنمەوە بۆچی پێویستە پڕۆژەی کەناڵ ئیستانبوڵ جێبەجێ بکرێت، چونکە لەگەڵ ئەو پڕۆژەدا، نۆکەندێک دروست دەکەین دژی کارەساتەکانی سروشت و دەبێتە مارکەیەک لە جیھاندا".