"ژماره‌ی حاڵه‌ته‌كانی تووشبوون به‌ كۆرۆنا له‌ دیاربه‌كر كه‌م بووه‌ته‌وه‌"

دیاربه‌كر – AA

وه‌زیری ته‌ندروستیی توركیا، فه‌خره‌دین كۆجا به‌ ئاماژه‌دان به‌وه‌ی كه‌ به‌ به‌راورد به‌ سێ هه‌فته‌ی رابردوو تووشبوون به‌ ڤایرۆسی كۆرۆنای نوێ له‌ دیاربه‌كر كه‌م بووه‌ته‌وه‌، رایگه‌یاند: "به‌هۆی هه‌وڵه‌ چڕوپڕه‌كانمان له‌و ماوه‌یه‌دا به‌ ڕێژه‌یه‌كی به‌رچاو ره‌وشه‌كه‌ كۆنتڕۆڵ كراوه‌".

وه‌زیری ته‌ندروستیی توركیا، فه‌خره‌دین كۆجا دوای ئه‌وه‌ی سه‌ردانی پارێزگاری دیاربه‌كر، مونیر كاراڵئۆغڵوی كرد و زانیاری وه‌رگرت له‌باره‌ی تووشبوون به‌ كۆرۆنا له‌و پارێزگایه‌، بۆ میدیاكاران دوا.

وه‌زیری ته‌ندروستیی توركیا، فه‌خره‌دین كۆجا تیشكی خسته‌ سه‌ر ئه‌وه‌ی كه‌ له‌ مانگی ئایاره‌وه‌ هه‌ڵمه‌تێكی به‌رفراوانیان ده‌ست پێ كردووه‌ بۆ به‌ره‌نگاربوونه‌وه‌ی ڤایرۆسه‌كه‌ و چوونه‌ته‌ قۆناغی دووه‌می شه‌پۆلی یه‌كه‌می په‌تاكه‌ و گوتی: "تووشبوون به‌ كۆرۆنا له‌ توركیا زیادی كردووه‌، به‌ڵام ئه‌وه‌ شتێكی گشتگیر نییه‌. له‌ كاتێكدا ژماره‌ی حاڵه‌ته‌كان له‌ ژماره‌یه‌ك پارێزگا له‌ دۆخێكی وه‌ستاودان، به‌ڵام به‌داخه‌وه‌ له‌ ژماره‌یه‌ك پارێزگای دیكه‌ زیادیان كردووه‌. بۆ نموونه له‌‌ پارێزگای دیاربه‌كر له‌م ماوه‌یه‌ی دواییدا حاڵه‌ته‌ تۆماركراوه‌كان زۆر بوون. پارێزگاكانی دیكه‌ی باشووری رۆژهه‌ڵاتی ئانادۆڵوش به‌ هه‌مان شێوه‌ به‌ قۆناغێكی سه‌ختدا تێپه‌ڕین".‌

وه‌زیری ته‌ندروستیی توركیا تیشكی خسته‌ سه‌ر ئه‌وه‌ی كه‌ به‌ به‌راورد به‌ سێ هه‌فته‌ی رابردوو تووشبوون به‌ ڤایرۆسی كۆرۆنای نوێ له‌ دیاربه‌كر كه‌م بووه‌ته‌وه‌، گووتی: "به‌هۆی هه‌وڵه‌ چڕوپڕه‌كانمان له‌و ماوه‌یه‌دا به‌ ڕێژه‌یه‌كی به‌رچاو ره‌وشه‌كه‌ كۆنتڕۆڵ كراوه‌. ئێستا ده‌توانم بڵێم له‌ ئه‌نجامی چڕكه‌نه‌وه‌ی هه‌وڵه‌كانماندا به‌ به‌راورد به‌ سێ هه‌فته‌ له‌مه‌وبه‌ر رێژه‌ی حاڵه‌ته‌كان بۆ له‌سه‌دا ٤٩ كه‌م بووه‌ته‌وه‌".