ئەرژەنتین بووە پاڵەوانی یاری کۆتایی جامی جیهانیی فیفا ٢٠٢٢

لە یاری کۆتایی جامی جیهانی فیفا ٢٠٢٢ی قەتەر، هەڵبژاردەی ئەرژەنتین بە لێدانی یەکلاکەرەوە جامەکەی بەرزکردەوە.

ماوەی ئاسایی یارییەکە بە یەکسانی بە ئەنجامی ٢-٢ کۆتایی هات و ماوەی درێژکراویش بە ئەنجامی ٣-٣ یەکسانبوو، ئەرژەنتین بە لێدانی یەکلاکەرەوە یارییەکەی یەکلاکردەوە و بۆ جاری سێیەم لە مێژوویدا جامە زێڕینەکەی بەرزکردەوە.

لە نیوەی یەکەمی یارییەکە هەڵبژاردەی ئەرژەنتین لە سەرەتاوە باڵادەستی خۆی نیشاندا و ناوەندی یاریگای کۆنتڕۆڵ کرد و لە رێگەی دی ماریا و مێسییەوە لە باڵەکانەوە هێرشەکانی چڕ کردبوویەوە.

لە بەرامبەردا هەڵبژاردەی فەڕەنسا، یاریی ناوەندی یارییەکەی لە دەستدابوو و نەیتوانی بە رێکی هێرش بۆ سەر گۆڵی ئەرژەنتین درووستبکات.

بەرهەمی فشار و هێرشەکانی ئەرژەنتین لە خولەکی ٢٢ هاتەدەست کاتێک دیماریا پەناڵتییەکی بەدەستهێنا و مێسسی بە ئاسانی گۆڵی یەکەمی ئەرژەنتین و شەشەمی خۆی لە مۆندیالی ٢٠٢٢ تۆمار کرد.

هەڵبژاردەی ئەرژەنتین، بەردەوام بوو لە هێرشەکان و دوای ئەو گۆڵە ویستی یاریزانان بۆ زیادکردنی گۆڵ بەرزتر بوویەوە و ئەوە بوو لە خولەکی ٣٦ ئەنخێل دی ماریا گۆڵی دوومی تۆمار کرد و جیاوازییەکەی بۆ دوو گۆڵ بەرز کردەوە.

هەڵبژاردەی فەڕەنسا، لە ماوەکانی داهاتووی نیوەی یەکەمی یارییەکە جگە لە گۆڕینی دوو یاریزان هیچ هەوڵێکی بەرچاوی بۆ گۆڕینی ئەنجامەکە نەدا و نیوەی یەکەم بەو ئەنجامە کۆتایی هات.

لە نیوەی دووەمدا ریتمی یارییەکە تاکو خولەکی ٧٩دا بە هەمان شێوە بەڕێوەچوو تاکو مباپێ لە خولەکی ٧٩ لە رێگەی پەناڵتییەوە جیاوازییەکەی بۆ گۆڵێک کەمکردەوە و لە خولەکی ٨١دا گۆڵی یەکسانبوونی تۆمارکرد و ماوەی ئاسایی بە ئەنجامی ٢-٢ کۆتایی هات.

- دوو گۆڵی دیکە لە ماوەی درێژکراوی یارییەکە تۆمار کرا

نیوەی یەکەمی ماوەی درێژکراو بەبێ گۆڵ کۆتایی هات و لە نیوەی دووەمدا هەردوو هەڵبژاردە بە ورییایی یارییان دەکرد.

لە خولەکی ١٠٩دا مێسسی جارێکی دیکە دەرکەوتەوە و لە تۆپێکی گەڕاوەدا لە گۆڵپارێزی فەڕەنسا لە نزیکەوە شووتێکی لێدا و گۆڵی سێییەمی بۆ ئەرژەنتین تۆمار کرد.

خۆشییەکانی ئەرژەنتین و هاندەرانی تەنها حەوت خولەکی خایاند کاتێک فەرەنسا پەناڵتییەکی دیکەی بۆ هەژمار کرا و مباپێ لە خولەکی ١١٨دا گۆڵی سێیەمی وڵاتەکەی و خۆی تۆمار کرد.

- لێدانی یەکلاکەرەوە

لە لێدانی یەکلاکەرەوەدا، هەریەک لە میسسی، دیبالا، پارادێس و مۆنتیال گۆڵیان تۆمار کرد جامی جیهانییان بۆ وڵاتەکەیان بردەوە.

لە بەرامبەردا هەریەک لە کۆمان و چاومی نەیانتوانی گۆڵ تۆمار بکەن و مباپێ و کۆلۆ مانی گۆڵیان کرد و پەناڵتییەکان بە ئەنجامی ٤-٢ لە بەرژەوەندی ئەرژەنتین کۆتایی هات.