دیداری سینەمای نێودەوڵەتیی كەركووك بۆ فێلمی كۆڤید

کەرکووک – AA

١٠ فیلم لە پێنج وڵات بەشداری دیدارەکەیان کرد کە ئەوانیش تورکیا، تونس، مەغریب، جەزائر و دوو فیلم لە ھەرێمی کوردستان و چوار فیلمیش لە شارەکانی عێراق بەشداربوون و سەرجەم دەقەکان گوزارشت بوون لە دۆخی بڵاوبوونەوەی ڤایرۆسی کۆرۆنا.

دیدارەکە دوو رۆژ بەردەوام دەبێت و ھەر رۆژە و پێنج فیلم نمایش دەکرێت و لە رۆژی دووەمیشدا، پێنج پزیشکی پسپۆڕی نەخۆشییەکانی کۆڤید سمینارێکی پزیشکی ساز دەکەن.

لەمبارەیەوە سەرۆکی دیداری سینەمای نێودەوڵەتیی کەرکووک بۆ فێلمی کۆڤید، سەردار زەنگەنە بۆ ئاژانسی ئانادۆڵو گوتی: "دیدارەکە تایبەتە بە فیلمی کۆڤید کە لەم دۆخەدا باسی رۆژ و گرنگترین تەوەری خەڵکە کە ژیانی ھەموومانی داگیرکردووە، بۆیە دیدارەکە تایبەت کرا بەکۆرۆنا و دیدارەکە بۆ ماوەی دوو رۆژ بەردەوام دەبێت و لە رۆژی یەکەمدا، پێنج فیلم نمایش دەکرێن و لە رۆژی دووەمیشدا، پێنج فیلمی کۆتایی نمایش دەکرێن کە سەرجەم ناوەڕۆکی فیلمەکان لەسەر کۆرۆنایە و رۆژی دووەمیش پێنج پزیشکی پسپۆڕی نەخۆشی کۆڤید سمیناری تایبەت بەڕێنمایی تەندروستی بۆ ھاووڵاتییان ساز دەکەن.

سەردار زەنگەنە گوتیشی: "١٨ فیلم پێشکەشی دیدارەکە کرابوون، بەڵام لیژنەی تایبەتمەند تەنھا ١٠ فیلمی قبوڵ کرد کە دوو فیلیمیان لە ھەرێمی کوردستان و چوار فیلمیش بەرھەمی شارەکانی عێراق بوون و چوار فیلمی نێودەوڵەتیش بەرھەمی تورکیا، تونس، جەزائر و مەغریب بوون.

یەکێک لە بەشداربوانی دیدارەکە دەرھێنەر عەلی جاسم بۆ ئاژانسی ئانادۆڵو گوتی: "سەرجەم فیلمەکان لەسەر بابەتی کۆرۆنا بوون، بەڵام ھەر فیلمێک بەشێوازی جیاواز گوزارشتیان لەو تراجیدیا کردووە و خۆشم بە فیلمی ژیان بەردەوامە بەشداری دیدارەکەم کرد کە فیلمێکی دیکۆمێنتاریە، ناوەڕۆکی فیلمەکە باس لە شێوازی بڵاوبوونەوەی ڤایرۆسی کۆرۆنا دەکات و وێنای ڤایرۆسەکەمان کردووە کە چۆنە و چۆن دەگوزارێتەوە و لە بەشەکەی تری فیلمەکە باسمان لەوەکردووە ئەگەر رێنماییە تەندروستییەکانمان جێبەجێ بکردابایە، ئەوا چی رووی دەدا و ژیانی ئێمە دەگەڕایەوە وەکو جاران و باشتریش دەبوو.

سینەماکاری دیاری کوردستان، حەمە عەلی خان میوانێکی دیداری سینەمای نێودەوڵەتیی کەرکووک بوو لە لێدوانێکیدا بۆ ئاژانسی ئانادۆڵو گوتی: "دەستخۆشی لە ستافی بەڕێوبەردنی دیدارەکە دەکەم و کارێکی گەورە و مەزن دەکەن و تەحەدای ئەم دۆخە تەندروستی و ئەمنییە خراپە دەکەن و ھاتوون خزمەتی سینەما دەکەن".

حەمە عەلی خان گوتیشی: "چاوەڕوانی تەواوبوونی فێستیڤاڵەکەین بۆ ئەوەی ئاستی دیدارەکە و فیلمە بەشداربووەکان بزانین و تا ئێستا کارەکانی بەباشی بەرێوەدەچێت".

لەسەر ئاستی فیلم و سینەما لە ھەرێمی کوردستان، حەمە عەلی خان ئاماژەی بۆ ئەوەکرد کە ناوبەناو فێستیڤاڵ و فیلمی سینەمایی نمایش دەکرێت، بەڵام ئەمانە بەقەد توموحی ئێمەی سینەماکار نییە و دەبێت پاڵپشتی باشی سینەماکاران و دەرھێنەرەکان بکرێت بۆ ئەوەی کاری باشتر پێشکەشی بینەران بکەن.