عێراق رووفاتی ٣٠٠ بێسه‌روشوێنبووی راده‌ستی كوێت كرده‌وه‌

به‌سڕا – AA

حكوومه‌تی فیدڕاڵی عێراق رووفاتی ٣٠٠ دیلی كوێتی راده‌ستی حكوومه‌تی كوێت كرده‌وه‌ كه‌ له‌ ده‌یه‌ی نه‌وه‌ده‌كانی سه‌ده‌ی رابردوو له‌لایه‌ن رژێمی به‌عس كوژران.

ئه‌ندامی لیژنه‌ی گه‌ڕان به‌دوای بێسه‌روشوێنه‌ عێراقی و كوێتییه‌كان و به‌ڕێوه‌به‌ری پۆلیسی به‌سڕا، ره‌شید فله‌یح به‌ میدیاكانی رایگه‌یاند كه‌ ژماره‌ی كوێتییه‌ بێسه‌روشوێنبووه‌كان له‌ عێراق ٦١٣ كه‌سه‌ و تا ئێستا ئێسك و پروسكی ٣٠٠ ته‌رمیان دۆزیوه‌ته‌وه‌ و راده‌ستی حكوومه‌تی كوێتیان كردوونه‌ته‌وه‌.

فله‌یح ئاماژه‌ی به‌وه‌ دا كه‌ به‌رده‌وامن له‌ كاره‌كانیان بۆ دۆزینه‌وه‌ی رووفاتی بێسه‌روشوێنان و ئێستا له‌ زیقاری باشووری عێراق ده‌ستیان به‌كاركردن كردووه‌ بۆ ئه‌م مه‌به‌سته‌.

دوو رۆژ له‌مه‌وبه‌ر ئه‌نجوومه‌نی ئاسایشی نێوده‌وڵه‌تی داوای له‌ حكوومه‌تی فیدڕاڵی عێراق كرد كه‌ به‌رده‌وام بێت له‌ كاره‌كانی بۆ چاره‌سه‌ركردنی كێشه‌ی بێسه‌روشوێنبووانی كوێتی.

له‌ كاتێكدا كوێت رایگه‌یاندووه‌ كه‌ ٣٢٠ هاووڵاتیی له‌ كاتی داگیركردنی كوێت له‌لایه‌ن سوپای عێراق له‌ ١٩٩٠ بێسه‌روشوێن بوون، عێراقیش ئاماژه‌ به‌وه‌ ده‌دا كه‌ زیاتر له‌ پێنج هه‌زار عێراقی بێسه‌روشوێن بوون.